Нұр-Сұлтан, BAQ.KZ. Жыл соңына дейін Қарағанды облысының Саран, Қарағанды және Шет ауданында 670 орындық үш балабақша пайдалануға беріледі. Сонымен қатар, ерекше білім беру қажеттілігі бар балалар үшін Қарағанды мен Абай ауданында тоғыз инклюзивті топ ашылады, деп хабарлайды ҚазАқпарат.
Қарағанды облысының білім басқармасы басшысының міндетін атқарушы Бақытгүл Әдекенова Өңірлік коммуникациялар қызметі платформасында өткен брифингте мектепке дейінгі және мектептегі білім беру жүйесіндегі жаңа нысандар мен жаңалықтар туралы баяндады.
1 маусымнан бастап мектепке дейінгі ұйымдарға балаларды қабылдау басталды. Оқуға қабылдау Indigo24.kz ақпараттық жүйесі арқылы жүзеге асырылады. Бүгінгі таңда 5 мыңнан астам сәби тіркелді.
Жыл соңына дейін Саран, Қарағанды және Шет ауданында 670 орындық тағы үш балабақша ашуды жоспарлап отырмыз. Ерекше білім беру қажеттілігі бар балалар үшін Қарағанды мен Абай ауданында тоғыз инклюзивті топ ашылады. Мектептерде жаңа оқу жылына дайындық бойынша белсенді жұмыстар жүргізілуде. Бұл ең алдымен 1-сыныпқа қабылдау. Биыл біз 21 мыңға жуық бірінші сынып оқушысын күтеміз. Бүгінгі күні облыс бойынша ата-аналардан тек 18 мың өтініш келіп түсті. 1-сыныпқа құжаттарды қабылдау 1 тамызда аяқталатынына назар аударғым келеді, – дейді Бақытгүл Әдекенова.
Бірінші сыныпқа қабылдау үшін құжаттарды egov.kz және e.bilimal.kz ақпараттық жүйесі арқылы беруге болады. Тамыз айында дәстүр бойынша мектептерде «Сәбилер мектебі» дайындық курстарының жұмысы ұйымдастырылады. Өңірде мектептерді оқулықтармен қамтамасыз ету мәселесі шешілді. Оларды сатып алуға 2,3 миллиард теңге бөлінді.
Жалпыға міндетті білім беру» қоры есебінен әлеуметтік осал отбасылардан шыққан оқушылар мектеп формасымен және кеңсе жабдықтарымен қамтамасыз етіледі. Ата-аналар мектептерге тиісті құжаттарды ұсынуы керек. «Көпбалалы және тұрмысы төмен отбасылардан шыққан балаларды мектепке дайындауға көмек көрсету үшін 1 тамыздан бастап дәстүрлі түрде «Мектепке жол» акциясы басталады. Биыл 143 білім беру нысанында, оның ішінде 32 күрделі сипаттағы нысандарда жөндеу жұмыстары жүргізілуде. 1 қыркүйекте Қарағандыдағы 11а шағын ауданының оқушылары үшін жаңа мектеп жұмысын бастайды. Теміртауда 12-ші мектеп ғимараты жаңартылуда, оның қызметі осы оқу жылында қайта жаңғыртылатын болады. Жаңа оқу жылына дайындық жұмыстары жалғасады, – деп қосты спикер.
Сондай-ақ брифингте мүмкіндік болған жағдайда мектептерде балалар мен оқулықтардың жеке заттарына арналған шкафтар орнатылады.
