2023 жылғы 6 наурыз күні сағат 20:32-де Алматы облысы ТЖД кезекші бөлігінің пультіне Қапшағай су қоймасындағы «Голубой залив» құмды жағажай ауданында мұз жарылып, сынған мұз кесегі жағадан алыстап бара жатқаны туралы хабарлама келіп түсті, деп хабарлайды BAQ.KZ.
Алматы облысы ТЖД баспасөз қызметінің мәлімдеуінше, мұздың сынған бөлігінде (мұздың қалыңдығы шамамен 15 см, сыртқы ауа температурасы +7 гр.,жаңбыр) 10 адам қалған. Оқиға орнына дереу Қонаев қаласының жедел-құтқару жасағының қызметкерлері жіберілді. Ауа-райының қолайсыздығы, тұман, жаңбыр мен жел жағдайында балықшыларды іздеу және құтқару бойынша іздестіру-құтқару жұмыстары ұйымдастырылды.
Шақырту орнына келген кезде жағадан 30 метр қашықтықта жеті балықшы мұздың сынған бөлігінде қалып қойғаны анықталды. Сағат 22-30-да ондағы барлық балықшыларды құтқарушылар жағаға жүзу құралдарының көмегімен эвакуациялады. 2023 жылғы 7 наурызда сағат 00.10-да қалған үш балықшы “Голубой залив” құмды жағажай ауданынан төрт шақырым жерде мұздың сынған басқа бөлігінен табылды. Құтқарылғандардың барлығы медициналық көмекке мұқтаж емес. Құтқарылған азаматтар құтқарушыларға алғыстарын білдірді.
Іздестіру-құтқару жұмыстарына Алматы облысы ТЖД 16 қызметкер, 5 бірлік техника және 2 резеңке қайық жұмылдырылды. Қазіргі уақытта бұл балықшылар су айдындарындағы қауіпсіздік ережелерін бұзғаны үшін ҚР ӘҚБтК-нің 412-бабы бойынша әкімшілік жауапкершілікке тартылды. Бұған дейін мұзда балық аулау әуесқойлары құтқарушыларға Қапшағай су қоймасындағы жұқа мұзға шығу қаупі туралы бірнеше рет ескертілген болатын, бірақ олар жұқа мұздың астына құлап кету қаупі туралы біліп, қауіпсіздік ережелерін елемейді. Қапшағай су қоймасы жұқа мұздың салдарынан үлкен қауіпке байланысты әуесқой балықшылар үшін жабық. Алматы облысы ТЖД қызметкерлері күн сайын қағидаларды түсіндіре отырып, профилактикалық іс-шаралар өткізіледі, оның барысында су айдындарындағы қауіпсіздік, дауыл туралы ескертулер туралы айтылады.
Құрметті мұз астынан балық аулау әуесқойлары! Алматы облысы ТЖД температураның жоғарылауына және желдің күшеюіне байланысты қазіргі уақытта мұзға шығу қауіпті екенін ескертеміз!
