Нұр-Сұлтан, BAQ.KZ. Павлордарда патрульдік полиция қызметкерлері бұрын жүргізуші куәлігінен мас күйінде жүргізгені үшін айырылған, бірақ рөлге қайта отыруға бел буған жүргізушілерді анықтау бойынша күн сайын рейдтік іс-шара жүргізеді. Бұл туралы облыстық полиция департаментінің баспасөз қызметі мәлім етті.
«Мәселен, ағымдағы жылдың 24 тамызында сағат 04:50-де Екібастұз қаласында М.Әуезов - Әди Шаріпов көшелерінің қиылысында полицейлердің назарына «ВАЗ-21093» автокөлігінің 35 жастағы жүргізушісі түсіп, ұсталды. Жүргізуші ұсталған кезде рөлде мас күйінде отырған. Құжаттарын тексеру кезінде оның 2018 жылдың қаңтар айында осы қылығы үшін ұсталып, 3 жылға жүргізуші куәлігінен айырылғаны анықталды. Алайда, жүргізуші ол іс-әрекетін ескермеген» , - деді облыстық полиция департаментінің баспасөз қызметі.
Ұсталған автокөлік тәркіленіп, айып тұрағына қойылды.
Көлік құралын басқару құқығынан айырылған адаммен көлік құралын мас күйде басқару фактісі бойынша ҚР ҚК-нің 1-бөлігі 346-бабына сәйкес сотқа дейінгі тергеп-тексеру басталды.
Жүргізушіге қатысты бұлтартпау шарасы ретінде ешқайда кетпеу туралы қолхат алынды. Енді ұсталған жүргізуші қайта сотты болады.
