Павлодар полициясы балалардың армандарын орындады, деп хабарлайды BAQ.KZ.
Жаңа жыл қарсаңында Павлодар қаласының тәртіп сақшылары тұрғылықты мекенжайы жоқ балалар мен аналарына арналған әлеуметтік-психологиялық оңалту және бейімдеу орталығына барып, ерекше қуаныш сыйлады. Балалардың Жаңа жылдағы армандарын орындау арқылы полиция қызметкерлері олардың өміріне қуаныш пен мейірім әкелді.
Балалардың хаттары Павлодар қаласы полиция басқармасы бастығының бірінші орынбасары Қанат Дүйсекеновтің қолына түскен. Балалардың арман-тілектерін оқыған ол өзін бір күнге сиқыршы ретінде сезініп, олардың арманын орындауды шешкен. Жаңа жылдық ертегінің ажырамас бөлігі – Аяз атаға жазылған хаттарда балалар өздеріне қандай сыйлықтар алғысы келетінін айтып, армандарымен бөліскен болатын.
Мерекелік шара барысында зал балалардың қуанышқа толы күлкісі мен шаттыққа бөленген дауыстарымен жанданды. Кішкентай жүректердің қуанышын орталық қызметкерлері де бөлісті.
Балалардың хаттарын оқып, олардың арманын орындауды жөн көрдім. Өзім де әкемін, сондықтан бұл күні балаларды ғажайыпқа сенімсіз қалдырғым келмеді. Мерекелік безендірілген шыршаның жанында балалар дайындаған өлеңдерін оқып, ән айтты. Өздерінің қысқы демалыс жоспарлары, оқу жетістіктері мен бағалары жайында әңгімелеп берді. Мен оларға сыйлықтар ұсынып, барлығына денсаулық пен бақыт тіледім, – деп бөлісті Қанат Дүйсекенов.
Полиция қызметкері бұл кездесудің тек балалар үшін ғана емес, өзі үшін де ерекше мәні болғанын мойындады. Ол мереке атмосферасын сезініп, балалардың жарқын жүздерін көру арқылы позитивке толы әсер алғанын жеткізді. Жаңа жыл – армандар орындалатын уақыт. Ал полицияның мейірімді ісі балаларға ғажайыптың бар екенін сезіндіріп, олардың жүрегіне үміт пен сенім ұялатты.
