Павлодар, BAQ.KZ тілшісі. Павлодар облысындағы онкологиялық диспансердің ұжымы кәсіби мерекелерін жаңа ғимаратта қарсы алмақ. Ескі нысанда орналасқан медицина мекемесінің барлық бөлімі заман талаптарына сай ғимаратқа көшірілді.
Жаңа диспансерлік кешен 14 ғимараттан құралған. Оның құрамында 200 орындық стационар, 100 орындық емхана, операциялық блоктар сияқты бөлімшелер шоғырланған.
Ал диспансер 70 жыл бұрын салынған бес қабатты ескі ғимаратта орналасқан еді. Ғимарат жатақханаға лайықталғандықтан, онкологиялық диспансердің талаптарына сай болмаған. Десе де, осындай емдеу мекемесінде инновациялық технологиялар енгізіліп, бір жылда жүздеген операция жасалды.
Облыстық онкологиялық диспансердің хирургиялық бөлімінің меңгерушісі Ульфат Боромбаевтың айтуынша, өткен күндер келмеске кетті. Енді жоғары технологиялы оталар мен емдеу шаралары заманауи құралдармен жабдықталған нысанда жасалады.
Диспансердің құрылысына мемлекет бюджетінен 7 млрд теңге бөлінді. Ал заманауи құрал-жабдықтарды сатып алуға 2 млрд теңгеден астам қаржы жұмсалды. Қазіргі ғимараттың жалпы аумағы 24 мың шаршы метрден асады, бұрынғы жерден 5 есе артық.
Бұрынғы ғимаратта үш операциялық блок болды. Енді біздің қарамағымызға кең әрі халықаралық стандарттарға жауап беретін бес бөлімше берілді. Ескі ауруханада 22 жыл бойы жұмыс істедім. Жаңашыл технологияларды ескере отырып салынған бұл блоктарда "таза ғимараттар кешені" бар. Яғни, ота жасауға арналған құралдар, препараттар, бәрі бір жерде шоғырланған. Осындай операциялық блоктар облыста тек кардиохирургия орталығында ғана бар. 3D бейнежүйесі, лапароскопиялық операцияларды жүргізуге арналған құралдар иелігімізде, - дейді ҚР Медицина үздігі Ульфат Боромбаев.
Бүгінгі таңда хирургиялық-жасақтау бөлімінде 20-ға жуық маман жұмыс істейді. Ал онкологиялық диспансерде 300 адамнан құралған ұжым бар.
