Павлодар облысының әкімі дезинсекциялық іс-шаралардың барысы туралы жиналыс өткізді, деп хабарлайды BAQ.KZ.
Дезинсекция жоспары осы маусымдағы ауа-райының жылдам өзгеруіне және табиғатты қорғау мақсатында жіберілетін су көлемінің ұлғаюына байланысты түзету енгізуді талап етті. Бүгін біз сіздермен бірге шыбын-шіркейге қарсы күрес стратегиясын бекіттік, - деп атап өтті өңір басшысы.
Жер қойнауын пайдалану басқармасының ақпараты бойынша Павлодар және Ақсу қалаларының, сондай-ақ, Павлодар ауданының 77 мың га жайылма алқабын әуеден өңдеу үшін 130 мың литр көлемінде биопрепарат суспензиясының 30% дайындалды.
Ғылыми сүйемелдеу тобымен жағалау бойында орналасқан барлық аудандардағы Ертіс өзенінің жайылмасына фенологиялық мониторинг жүргізілді. 19 сәуірде Павлодар ауданының Заря ауылының маңындағы жиналған еріген суларда дернәсілдер анықталды. 20-21 сәуірде дернәсілдер барлық жағалау аймақтарында байқалды, дернәсілдердің дамуы әрбір жерде әр түрлі.
Асайын Байханов су шаруашылығы жағдайын ескере отырып, әуеборттарын 10 бірлікке дейін ұлғайту қажеттігіне назар аударды. 25 сәуірде Атамекен кентінің әуеайлағына барлық АН-2 әуеборттары бір мезгілде келеді деп күтілуде. Қалалар бойынша жертөле үй-жайларын бастапқы өңдеу кезеңі аяқталды, жұмыстар қажеттілігіне қарай жүргізілетін болады.
Өздеріңізге белгілі, Семей қаласында орын алған жағдайға байланысты Шүлбіден жіберілетін судың көлемі 3500 м3/сек-тан 3200 м3/сек-ке дейін төмендетілді. Сонымен қатар, 18 сәуірде ведомствоаралық комиссияның кезектен тыс отырыстары өткізіліп, судың көлемін біртіндеп 50 м3/с қоса отырып 3350 м3/с дейін ұлғайту туралы шешім қабылданды.
Қазгидрометтің дерегі бойынша: бүгінгі таңда ШҚО тауларында қар жамылғысының шамамен 51%-ы бар. Қатты еріген жағдайда бүйірлік су ағыны ұлғайып, су жіберілу кезеңінің ұзаққа созылуына әкелуі мүмкін. Бұл шіркейдің жаппай ұрықтану қаупін арттырады.
Осы қауіпті ескере отырып, нүктелер арасындағы қашықтықты қысқарту арқылы биологиялық препаратты құю нүктелерінің санын 8-ден 10-ға дейін арттыру туралы шешім қабылданды. Өзенді өңдеу жұмыстарының болжамды мерзімдері анықталды.
1-ші тур 16-17 мамырда басталады деп жоспарлануда; 2-ші тур 26-27 мамырда өтеді; 3-ші тур - 10-15 маусым. Су шаруашылығы жағдайын ескере отырып, өзгерістер болуы мүмкін.
