Нұр-Сұлтан, BAQ.KZ. Бүгін Мәжіліс спикері Нұрлан Нығматулиннің төрағалығымен өткен жалпы отырыста сот жүйелері мен судьялардың мәртебесіне қатысты бірқатар заң жобасы мақұлданды.
Олар депутаттардың бастамасымен әзірленді. Бұл заң жобалары Әкімшілік рәсімдік-процестік кодексті қабылдау және оны биылғы 1 шілдеден бастап қолданысқа енгізу бойынша сот жүйесінің жұмысына түзетулер енгізуді талап етті.
Мәжіліс төрағасы Нұрлан Нығматулин аталған заң жобалары сот жүйесін жаңғыртудың жалғасы екенін алға тартты.
Жақында ғана Мемлекет басшысы Қасым-Жомарт Кемелұлы Тоқаев сот жұмысының ашық, әділ және заман талабына сай болуына ерекше назар аударды. Сондықтан бүгінгі құжаттарда осы талаптарды заң жағынан қамтамасыз етуге арналған маңызды нормалар қабылданды. Енді осы нормалар сот саласына білікті, кәсіби, тәжірибелі, жаңа мамандарды тартуға, сот процесіне жоғары технологиялық мүмкіндіктерді енгізуге жол ашатын болады, - деді ол.
Сондай-ақ Палата төрағасы сот жүйесіндегі реформаларды заң жағынан қамтамасыз ету жұмыстарын одан әрі жалғастыратынын атап өтті.
