Бас жаңалықтар
Вирусты қоғамдық көлікте жұқтыру қаупі 25%-ға дейін жетіп отыр
15 Наурыз 2021, 14:42 606

Вирусты қоғамдық көлікте жұқтыру қаупі 25%-ға дейін жетіп отыр

Алматы, BAQ.KZ тілшісі. Бұл туралы Алматы қаласы Бостандық ауданының әкімі Алтай Рахымбетов өңірлік коммуникация алаңында өткен онлайн брифингте айтты.

Оның айтуынша, 2020 жылы аталған ауданда барлығы 3 014 адам індет жұқтырған болса, биыл 681 адамның коронавирус жұқтырғаны анықталған. Соңғы 3 күнде 73 тұрғыннан коронавирус анықталыпты. 

Вирустың қайта өршуіне байланысты 2021 жылғы 10 наурыз күні Алматы қаласының бас санитарлы дәрігерінің індеттің алдын-алуға бағытталған шараларды күшейту туралы қаулысы шықты. Алайда аталған қатаң шаралардың қажеттігін және адам денсаулығы үшін маңыздылығын барлық кәсіпкерлер жіті түсінбеген сияқты. Қабылданған қаулыға қарамастан көптеген түнгі клубтар, караоке барлар, компьютерлік клубтар өз жұмысын тоқтатпай, індеттің таралуына жол ашып отыр,-дейді ол.   

авто45.jpeg

Жүргізілген сараптама жұмыстары көрсеткеніндей ойын-сауық орталықтары мен сауда үйлерінде ауруды жұқтыру деңгейі 22% өскен, базарларда 13% артқан, қоғамдық көлікте жұқтыру қаупі  25% дейін жетіп отыр.  

Осы ретте ауданымыздағы мониторинг жұмыстарын күшейту мақсатында мониторингтік топтардың саны 4-тен 7-ге дейін ұлғайтылды. Ағымдағы жыл басынан бері аталған мониторингтік топтармен барлығы 1 233 нысан тексеріліп, 27 заңды тұлғаға қатысты 9,8 млн тенгенің және 144 жеке тұлғаға қатысты 6,3 млн тенгенің әкімшілік хаттамасы толтырылды,-дейді аудан әкімі.  

Сонымен қатар ол карантин режимін ең көп бұзатын нысандарды атады. Олардың қатарында Караоке Crystal, Гастробар Gastreat, Рестобар ВанГог, Queer  түнгі клубы, BE TO BEE бары, STRONG компьютер клубы және тағы басқалары бар.

9 нысан бойынша тиісті материалдар сотқа жолданған. Оның 5-уі бойынша соттың шешімі шығарылыпты. Қалған 4 нысан бойынша тиісті шаралар жүргізілуде. 

Өткен демалыс күндері, яғни 13-14 наурыз күндері ауданда орналасқан барлық ірі сауда орталықтары жабылды. Қоғамдық көліктің жұмысына қатаң бақылау ұйымдастырылды. Жолаушылардың маска режимін сақтау туралы тәртібі қатаң бақылауда. Індетпен күрестің тиімді жолдарының бірі вакцинация екені белгілі. Бірінші кезекте 792 медицина қызметкерлері вакцинациядан сәтті өтті. Қазіргі таңда полиция және білім мекемелерінің қызметкерлері вакцинациядан өтуде,-деді Рахымбетов.



Фото: ашық дереккөз
Загрузка...