Нұр-Сұлтан, BAQ.KZ тілшісі. Қазақстан Президенті Қасым-Жомарт Тоқаев ТМД елдерінде вакцинация паспорттарын тануды жеделдетуді ұсынды.
Қиын кезеңде ТМД мемлекеттері бір-біріне қажетті қолдау мен көмек көрсете отырып, бірлік пен ынтымақтастық танытты. Мұнда Ресей өте маңызды рөл атқарды. Біздің елдеріміз коронавирустық инфекциямен күресуде жақсы тәжірибе жинады. Оның ішінде вакцинаны әзірлеу саласында. Халықты жаппай иммундау ғана жағдайды өзгертуге және азаматтарымыздың қауіпсіздігін қамтамасыз етуге мүмкіндік беретіні анық. QazVac-тың қазақстандық әзірлемесі жоғары тиімділікті көрсетеді, - деп айтты Тоқаев.
Оның айтуынша, жаңа препарат клиникалық сынақтардан сәтті өтуде. Тағы үш вакцина клиникаға дейінгі сынақ сатысында. Одан бөлек, Қазақстан ресейлік «Спутник V» вакцинасын шығаруды жалғастырып жатыр.
Сіздердің елдеріңіз де осы салада белсенді жұмыс жүргізіп жатқанын білемін. Қазақстан тығыз ынтымақтастыққа, тәжірибе алмасуға және өз вакциналарын ықтимал жеткізуге дайын. Сондай-ақ ТМД кеңістігінде вакцинация паспорттарын өзара тануды жеделдетуді ұсынамын. Бұл өзара сенім мен ынтымақтастықтың маңызды сәті, - деп айтты Мемлекет басшысы.
Оның сөзінше, мұндай шешімді қабылдаудың арқасында азаматтардың еркін қозғалысы қамтамасыз етіледі және іскерлік байланыстар жандандырылады.
