Нұр-Сұлтан, BAQ.KZ тілшісі. Қазақстан президенті Қасым-Жомарт Тоқаев əлеуметтік осал топтағы азаматтардың несиесін өтеуді тапсырды.
"Мен бүгін мұқтаж азаматтарды əлеуметтік қолдау шараларын қарастыратын бұрын-соңды болмаған Жарлыққа қол қойдым. Маған азаматтардан тұтынушыларға арналған кепілсіз несиені төлеуге көмек сұрап, көптеген өтініштер келіп түседі. Адамдар несие бойынша қарызын қалай төлейтінін білмейді. Бұл проблема 500 мыңға жуық азаматта бар. Мен Қазақстан басшысы ретінде адамдардың қарызға белшеден батқанына бейжай қарай алмаймын. Үкіметке бір реттік акция ретінде келесі шараларды қабылдауды тапсырдым. Мемлекет тікелей адрестік көмек ретінде мен жоғарыда атаған санаттағы ірі заем алған азаматтардың қарызының негізгі бөлігі мен оған есептелген сыйақыны өтейді", - деді Қасым-Жомарт Тоқаев Ақордада өткен БАҚ қызметкерлері мерекесіне арналған салтанатты жиында.
Қазақстан Республикасы азаматтарының борыш жүктемесін азайту шаралары туралы.
Өмірлік қиын жағдайда қалған Қазақстан Республикасы азаматтарының борыш жүктемесін азайту жөнінде уақтылы көмек көрсету мақсатында қаулы етемін:
1. Қазақстан Республикасының Үкіметі екінші деңгейдегі банктердегі және микроқаржы ұйымдарындағы кепілсіз тұтынушылық қарыздары бойынша мынадай жағдайларда:
1) аталған қарыздар бойынша борышкерлер көпбалалы отбасылар, асыраушысынан айрылу жағдайына байланысты төлем алатын отбасылар, мүгедек балалары бар, 18 жастан асқан, бала жасынан мүгедектер бар отбасылар, атаулы мемлекеттік әлеуметтік көмек алатындар, жетім балалар, ата-анасынан кәмелеттік жасқа дейін айрылған, жиырма тоғыз жасқа толмаған, ата-ананың қамқорлығынсыз қалған балалар;
2) қарыз бойынша жалпы берешегі 2019 жылғы 1 маусымдағы жағдай бойынша 3 000 000 (үш миллион) теңгеден аспайтын болса;
3) бір қарыз алушыға 2019 жылғы 1 маусымдағы жағдай бойынша негізгі борышы мен оған есептелген сыйақыдан тұратын өтелетін берешегінің мөлшері 300 000 (үш жүз мың) теңгеден аспайтын болса, оларды өтеу бойынша біржолғы тәртіпте шаралар қабылдасын.
2. Қазақстан Республикасының Үкіметі, Қазақстан Республикасының Ұлттық Банкі:
1) банктерде және микроқаржы ұйымдарында кепілсіз тұтынушылық қарыздары бар Қазақстан Республикасы азаматтарының 2019 жылғы 1 шілдедегі жағдай бойынша есептелген айыппұлдары мен өсімпұлдарын есептен шығару;
2) Нұр-Сұлтан, Алматы, Шымкент қалаларының және облыстардың әкімдерімен бірлесіп Осы Жарлықты іске асыру жөнінде өзге де шараларды қабылдасын.
3. Қазақстан Республикасының Ұлттық Банкі өзіне шектен тыс тәуекелдерді алған қаржы ұйымдарының жауапкершілігін күшейту бойынша:
1) мерзімі өткен берешегі 90 күннен асып кеткен жеке тұлғалардың барлық кепілсіз тұтынушылық қарыздары бойынша кредитті берумен және оған қызмет көрсетумен байланысты тұрақсыздық айыбын, комиссиялар мен өзге де төлемдерді есептеуге тыйым салуды;
2) табысы күнкөріс деңгейінен төмен азаматтарға қарыздар беруге тыйым салуды;
3) кепілсіз тұтынушылық қарыздарды беру кезіндегі реттеудің қосымша шараларын көздейтін реттеушілік сипаттағы қатаң шаралар қабылдасын.
4. Осы Жарлықтың орындалуын бақылау Қазақстан Республикасы Президентінің Әкімшілігіне жүктелсін.
5. Осы Жарлық қол қойылған күнінен бастап қолданысқа енгізіледі.
