Мемлекет басшысы "Siemens AG" компаниясының атқарушы директорымен кездесті

15 Ақпан 2020, 18:37
1503
Бөлісу:
Мемлекет басшысы "Siemens AG" компаниясының атқарушы директорымен кездесті

Нұр-Сұлтан, BAQ.KZ. Мемлекет басшысы "Siemens AG" компаниясының атқарушы директоры Джо Кэзермен кездесті. Бұл туралы Ақорданың баспасөз қызметі хабарлады. 

Қасым-Жомарт Тоқаев пен Джо Кэзер Қазақстан мен "Siemens AG" компаниясы арасындағы инвестициялық ынтымақтастықты нығайтудың перспективаларын талқылады. Әңгімелесу барысында цифрландыру мәселелеріне баса мән берілді.

Қасым-Жомарт Тоқаев аталған бағыттың аса маңыздылығын атап өтіп, Джо Кэзерге Қазақстанда енгізіліп жатқан цифрлық технологиялар туралы айтты.

Цифрландыру ісін дамыту – мемлекет басшысы ретінде, мен үшін де, біздің Үкіметіміз үшін де аса маңызды. Біз осы сала бойынша көптеген табысты жобаларды жүзеге асырдық. Дегенмен, алға жылжу үшін шешілуі тиіс бірқатар мәселе бар. Экономиканы цифрландырмай, айтарлықтай табысқа қол жеткізу өте қиын, – деді Қазақстан президенті.

Джо Кэзер "Siemens AG" компаниясының Қазақстанмен өзара ықпалдастығын жоғары бағалап, жемісті ынтымақтастықтың жалғасатынына сенім білдірді.

Кездесуде Қазақстан Үкіметі мен "Siemens AG" компаниясы арасындағы өзара түсіністік туралы меморандумның маңызды рөл атқаратыны айтылды. Бұл құжат сауда-экономикалық және инвестициялық байланыстарды дамытуға тың серпін береді. Аталған меморандумға 14 ақпанда қауіпсіздік жөніндегі Мюнхен конференциясы аясында қол қойылды. 


Өзгелердің жаңалығы