Нұр-Сұлтан, BAQ.KZ. Шымкент қаласындағы физика-математика бағытындағы НЗМ оқушылары II «Ұлы дала ұрпағы» атты республикалық өнер сайысының облыстық кезеңінде топ жарды.
Мектеп оқушылары мен жасөспірімдер арасында өткен байқауда Назарбаев зияткерлік мектебінің «Ұлы дала мұрагерлері» ансамблі «Ерке сылқым» күйін мүдірмей орындап, 10-нан астам шымкенттік өнер ұжымын артта қалдырды. Бұл жеңіс оларға Алматы қаласында өтетін республикалық кезеңге жолдама сыйлады.
«Бұл біздің алғашқы байқауымыз емес. Бұған дейін де бірнеше сайысқа қатысып, жеңімпаз атанып үлгергенбіз. Десе де, осы жолы ерекше дайындықпен келдік. Оқушыларым бар білгендерін ортаға салып, күйді бір адамдай орындап шықты. Енді республикалық кезеңде Шымкент қаласының намысын қорғап, жүлдегер атануды көздеп отырмыз», - дейді ансамбль жетекшісі Дархан Серікбай.
Айта кету керек, «Ұлы дала мұрагерлері» ансамблінің құрылғанына 1 жылдан енді асты. Бүгінгі таңда олардың қоржындарында 10-ға тарта күй бар.
