Бас жаңалықтар
Жайық жағасындағы сенбілік. 52 тонна қоқыс, 4,3 тонна өлі балық
17 Наурыз 2019, 12:14 566

Жайық жағасындағы сенбілік. 52 тонна қоқыс, 4,3 тонна өлі балық

Атырау, BAQ.KZ.  "Nur Otan” партиясы Атырау филиалы мен облыстық әкімдіктің ұйымдастыруымен жалпықалалық сенбілік өтті. "Таза жағалау" сенбілігіне 2600-ден астам тұрғын қатысты. Бұл туралы Атырау облыстық Өңірлік коммуникациялар қызметі хабарлады.

"Сенбілікке қатысқандар қатары көп болды, 52 тонна қоқыс жиналды. Келесі жолы да барлық тұрғынды осы бастаманы қолдауға, жағалауды тазалауға қатысуға шақырамыз,  - дейді Азаматтық орталықтың медиа бөлімінің меңгерушісі Сымбат Жандарбек.

Сонымен қатар, сенбілік қорытындысы бойынша 4,3 тонна өлі балық жиналды, балықтардың салмағы есептеліп, қылмыстық іс материалына тіркелді.

10 желтоқсан 2018 жылдан бастап «Казгидромет» РММ Жайық өзеніндегі су жағдайына мониторинг жүргізіп келеді. Зертханалық сынамалар ластанудың жоғары және өте жоғары деңгейін көрсеткен жоқ. Қазір Қазгидромет мониторинг аясында штаттық режимде апта сайын сынама алып отыр. Су сынамасын Экология департаменті мен тұтынушылар құқығын қорғау департаменті де жүргізуде.

Бүгінге дейін 200-ден астам сынама алынды. Бұл өзеннің жағдайына мониторинг үшжақты жүргізіліп жатқанын және өзен жағдайы қалыпты екенін көрсетеді.

Айта кету керек, қырылған балықтардың басым бөлігі  (102,862 тонна) жасанды түрде өсірілген, яғни өзендегі бекіре тұқымдас балықтардың табиғи популяциясына қатысы жоқ. Жайықтағы балық қорының табиғи популяциясына жиналып алынған жалпы салмағы 11,3 тонна частик тұқымдас балықтар жатады.

Сонымен қатар, ҚР Энергетика министрлігі Атырау облыстық әкімдігімен бірлесіп тұрақты түрде аймақтың экологиялық ахуалын жақсарту жөніндегі кешенді жоспарды дайындауда. Жағдайға мемлекеттік органдармен бірге «Nur Otan» партиясының облыстық филиалы, Атырау облыстық әкімдігі мониторинг жүргізіп отыр. «Nur Otan» партиясының филиалымен қатар ішкі істер органдарының қызметкерлері, ҚР Ауыл шаруашылығы министрлігі ветеринарлық қадағалау комитеті қызметкерлері сауда орындарындағы балық сататын нүктелерге күн сайын тексеру жұмыстарын жүргізеді.

Атырау облыстық әкімдігі Жайық өзеніне ғылыми зерттеу жүргізуге 80 млн теңге бөлді.

Сізден жаңалық