Сапарбаев мүгедек балалары бар отбасылардың жәрдемақысы қаншаға өсетінін айтты

Астана, BAQ.KZ тілшісі. ҚР Еңбек және халықты әлеуметтік қорғау министрі Бердібек Сапарбаев Үкімет отырысында осындай мәлімет берді.

«Келесі көмек - мүгедек балалары бар отбасыларға көмек. Ол дегеніміз, мүгедек балаларға қарау. Одан кейін кейбір мүгедек балалар олар бірінші топта, яғни өмір бақи мүгедек, соларға да берілетін көмек. Егер осыған дейін оларға 31 183 теңге төленіп келсе, бірінші шілдеден бастап 41 578 теңге төленетін болады. Біздің есебіміз бойынша, осы шарамен кемінде 100 мың қазақстандық қамтылады», - деді Бердібек Сапарбаев. 

Бұған дейін министр биыл 830 мың адам атаулы әлеуметтік көмекпен қамтылатынын және тұрмысы төмен отбасының балаларына жәрдемақы 23 жасқа дейін төленетінін айтты.

Кеше «Нұр Отан» партиясының XVIII съезінде Қазақстан президенті Нұрсұлтан Назарбаев Үкіметке еліміздегі бірқатар әлеуметтік мәселені шешуді тапсырды. Олардың қатарында аз қамтылған, мүгедек баласы бар, толық емес және көпбалалы отбасыларды қолдау шаралары бар.

«Атаулы әлеуметтік көмек алуға құқылы балалы отбасыларды қолдау үшін көпбалалы жанұялардағы әр балаға ең төменгі төлемді 20 789 теңге сомасында бекіту керек. 2019 жылы атаулы әлеуметтік көмекпен 830 мың адам қамтылады, оның 550 мыңға жуығы – балалар. Бұнымен қатар, мүгедек балаларды тәрбиелеп отырған ата-аналар, қамқоршылар мен отбасыларға (тұлғаларға) берілетін жердемақыны 30 процентке ұлғайтуды тапсырамын», - деді Съезде Назарбаев. 

Президент бұған қоса, «Нұрлы жер» бағдарламасы аясында 40 мыңнан астам жалдамалы пәтер салуды тапсырды. «Олардың басым бөлігі тұрмысы төмен көпбалалы отбасыларға берілуі тиіс. Осы мақсатқа алдағы 7 жылда қосымша жыл сайын 50 млрд теңгеден бөлінеді» деді Елбасы.

Сонымен қатар, Мемлекет басшысы табысы төмен, мүгедек балалары бар, көпбалалы отбасылар мен толық емес жанұялар үшін баспанаға қол жетізу мүмкіндігін арттыруды, азаматтардың бұл санатына ТҮҚЖБ арқылы жылына 2-3 процентпен тұрғын үй заемдарын беру механизмін әзірлеуді тапсырды.

Ел президенті сондай-ақ, биылғы шілдеден бастап еңбекақысы төмен мемлекеттік қызметкерлердің жалақысын 30 процентке ұлғайтуды тапсырды.

Қымбат ЕЛТАЙҚЫЗЫ