Бас жаңалықтар
Алматыда "Қарқаралы" деректі фильмінің тұсаукесері өтті
14 Желтоқсан 2019, 10:57 5325

Алматыда "Қарқаралы" деректі фильмінің тұсаукесері өтті

Нұр-Сұлтан, BAQ.KZ. 13 желтоқсанда ҚР Ұлттық кітапханасының кинозалында режиссер Олег Беляловтың "Қарқаралы" фильмінің тұсаукесері өтті. Бұл туралы "Қазақфильм" АҚ баспасөз қызметі хабарлады.

"Қазақстанның табиғаты" циклы бойынша түсірілген бұл туындының көрсетілімінде бос орындар болмады. Деректі фильмді ҚР Мәдениет және спорт министрлігі тапсырысы бойынша Ш.Айманов атындағы "Қазақфильм" киностудиясы түсірген.

Олег Беляловтың жаңа туындысы Орталық Қазақстанның ең көрікті жерлерінің бірі – Қарқаралы ұлттық саябағы туралы баяндайды. Бұл фильм көрермендерге құпиясын бүгіп жатқан Қарқаралының ғажайып табиғатын ашып, ұлттық саябақта мекендейтін жабайы жануарлар мен құстар туралы көп мағлұмат береді. Картинаның режиссері Арқаның хас сұлуы – Қарқаралы саябағын жылдың төрт маусымында түсіргенін айта кеткен жөн.

Көрсетілімнен кейін фильмнің шығармашылық тобы түсірілім барысындағы ерекшеліктерімен бөлісті. Режиссер Олег Белялов картинаны жасауға қатысқан түсірілім тобына алғысын айтты. 

04.jpg

Тұсаукесерге "Қазақфильмнің" президенті, Қазақстанның еңбек сіңірген қайраткері Арман Әсенов және өзі басшылық еткен жылдары киностудияда документалистиканың мықты мектебін қалап, "Қазақстанның табиғаты" циклы бойынша фильмдерді түсіруді қолға алған авторлардың бірі, ақын Бақыт Қайырбеков қатысты.

Фильмнің түсіру тобын оның премьерасымен құттықтаған Арман Әсенов бүгінгі күні де Ш. Айманов атындағы "Қазақфильм" киностудиясында деректі фильмдерге үлкен көңіл бөлінетінін айтты.

Документалистика – кино өнеріндегі ең күрделі жанр. Белгілі бір көріністі түсіріп алу үшін өте көп уақыт жұмсалады. Ал көркем фильмде бәрі басқаша, керек кадрды алдын ала қойып, актерлерге тапсырма бересің де түсіре бересің. Деректі кино – бұл үлкен жұмыс, - деді Арман Әсенов.

Фото: дереккөз
Загрузка...