Бас жаңалықтар
Параға айфон алған Байқоңыр ауданының әкімі кінәсін мойындады
23 Қаңтар 2020, 16:24 240

Параға айфон алған Байқоңыр ауданының әкімі кінәсін мойындады

Нұр-Сұлтан, BAQ.KZ тілшісі. Бұл туралы ҚР Сыбайлас жемқорлыққа қарсы іс-қимыл агенттігінің бірінші департаментінің аға тергеушісі Данияр Биғайдаров мәлімдеді. 

Нұр-Сұлтан қаласының Сыбайлас жемқорлыққа қарсы іс-қимыл агенттігі Нұр-Сұлтан қаласының Байқоңыр ауданы әкімінің пара алу фактісін анықтады. Ол пара ретінде жеке компания өкілінен соңғы үлгідегі айфон телефонын алған. Әкім параны Байқоңыр ауданын абаттандыру бойынша жұмыстарды алуға көмектескені және жалпы қамқорлығы үшін алған деп күдіктелуде, - деді Агенттік өкілі. 

Оның айтуынша, қазіргі таңда тергеу жұмыстары жүргізіліп жатыр. 

Күдіктілер кінәсін мойындап, қылмыстық істі сотқа жедел түрде жіберуге арыз жазды, - деді Данияр Биғайдаров.

Айта кетейік, Нұр-Сұлтан қаласының Байқоңыр ауданының әкімі болып 2019 жылдың сәуір айында Асқар Есілов тағайындалған еді. Ол бұған дейін Нұр-Сұлтан қаласының Алматы ауданы әкімінің орынбасары, "Астана ЭКСПО-2017" ҰК" АҚ-ның Корпоративтік басқару департаментінің директоры болып жұмыс істеген.

Сонымен қатар, елордадағы М. Горький атындағы мемлекеттік академиялық орыс театрының басшылығына қатысты сотқа дейінгі тергеуді жүріп жатыр.

Олар орындалған жұмыстардың жалған актілеріне қол қою арқылы театр ғимаратын жөндеу-қалпына келтіру жұмыстарына және күрделі жөндеуге бөлінген 400 млн теңгеден астам бюджет қаражатын жымқырды деп күдікке ілінді. Қазір сотқа дейінгі тергеу жалғасуда, - деді Агентіктің аға тергеушісі.

Күдіктілерге қатысты түпкілікті шешімді сот шығарады.


Фото: ашық дереккөз
Загрузка...