Бас жаңалықтар
Қорғаныс министрлігі: Нәтиже сөзде емес, істе
PHOTO
26 Қаңтар 2021, 14:40 195

Қорғаныс министрлігі: Нәтиже сөзде емес, істе

Нұр-Сұлтан, BAQ.KZ. ҚР Қорғаныс министрлігінде өткен апталық аппарат кеңесінде әскерлер мен бөлімшелердегі сыбайлас жемқорлыққа қарсы іс-қимылдың ағымдық жай-жапсары жөнінде мәлімет тыңдалды.

Барлық факторларды, соның ішінде сыбайлас жемқорлыққа қарсы күрестегі объективті себептер мен нақты нәтижелерді ескере отырып, қорғаныс ведомствосы сыбайлас жемқорлыққа қарсы шараларды іске асыру мәселелерін қатаң бақылауға алады.

Ел әскерінде сыбайлас жемқорлыққа мүлдем жол бермеу – біздің мақсатымыз. Біз Қарулы Күштердегі осы зиянды құбылысты азайтуды емес, толық жою туралы айтуымыз керек, сонымен қатар жұмыстың нәтижесін тиісті сандармен нақтылауымыз қажет, - деп атап өтті кеңес барысында қорғаныс ведомствосының басшысы генерал-лейтенант Нұрлан Ермекбаев.

Қорғаныс министрлігінің сыбайлас жемқорлыққа қарсы комиссия төрағасы генерал-лейтенант Тимур Дәндібаевқа, Бас әскери полиция басқармасына, әскер түрлерінің қолбасшыларына және өңірлік қолбасшылықтардың және әскер тектерінің қолбасшыларына Қорғаныс министрі жеке жауапкершілік жүктеді. Оларға – биыл бірде-бір сыбайлас жемқорлық жасауға жол бермеу міндеті қойылды.

Коронавирус пандемиясы жағдайында ҚР Қарулы Күштерінің жауынгерлік әзірлігі мәселесі ел басшылығының ерекше бақылауында қалып отыр.

Бейне конференция байланысы арқылы Қорғаныс министріне әскер түрлерінің бас қолбасшылары, тектерінің қолбасшылары ағымдағы жағдай, жауынгерлік даярлық жағдайы және санитарлық-эпидемиологиялық талаптардың сақталуы жөнінде баяндады.

Нұр-Сұлтан мен Алматыда жұмыс істейтін ел әскеріндегі әскери-медициналық қызметінің ПТР-зертханаларында бір апта ішінде 1 мыңға жуық талдама жүргізілді. Бұдан бұрын хабарлағандай, жақын арада Ақтауда осындай зертхананы ашу аяқталмақ.

Қорғаныс министрі коронавирус індетінің таралуы бойынша «қызыл» аймақтағы әскери және өзге де бөлімшелер жеке құрамының 80%-ын қашықтықтан жұмыс істеу режиміне ауыстыруды, бұл ретте санитарлық-эпидемиологиялық талаптардың сақталуын бақылауды күшейтуді, әскери қызметшілердің бір-бірімен байланысын барынша болдырмауды және COVID-19 сырқатын жұқтырудың жаңа жағдайлары жөнінде уақтылы хабарлауды қамтамасыз етуді тапсырды.

Аппарат кеңесі барысында ҚР ҚК Әскерлерді пәтерлерге орналастыру бас басқармасының жаңа бастығы полковник Аманжол Баймағанбетовті таныстырды. Оған әскери инфрақұрылым объектілерін салу және оларға қызмет көрсету кезінде жұмыстарды бақылаудың тиімділігін арттыру қажеттігіне назар аудару тапсырылды.

Ведомство басшысы Талдықорған гарнизонының инфрақұрылымына қатысты бірқатар ескертулер жасап, қызметтік тергеу жүргізуді, сондай-ақ модульдік казарма салу кезінде жіберілген барлық кемшіліктерді қысқа мерзімнің ішінде жоюды және мердігерлерге қатаң шаралар қабылдауды тапсырды.

Жауынгерлік және дене даярлығы машығы бағдарламасының сапасын тексеру мақсатында қорғаныс ведомствосының басшысы Қазақстан Қарулы Күштері командаларының «АрХО-2021» Армия халықаралық ойындарына қатысуы жөнінде шешім қабылдады.

Генерал-лейтенант Нұрлан Ермекбаев барлық санитарлық-эпидемиологиялық талаптарды сақтауға, техниканың дайындығын бағалауға, жолдар мен қажетті инфрақұрылымды жабдықтауға, мақсатқа сай қатысатын конкурстардың тізімін анықтауға нұсқау берді.


Фото: дереккөз
Загрузка...