Бас жаңалықтар
Халықаралық рейтинг. Қазақстандық білім қайда?
21 Қазан 2019, 12:38 478

Халықаралық рейтинг. Қазақстандық білім қайда?

Нұр-Сұлтан, BAQ.KZ. Үкімет сағатында ҚР Білім және ғылым министрі Асхат Аймағамбетов қазақстандық білім халықаралық рейтингтерде нешінші орында екендігін айтты, деп хабарлады ҚР БҒМ баспасөз қызметі.

Білім және ғылым министрінің айтуынша, Қазақстан 2017 жылдан бастап білім беру және инновациялық саясат жөніндегі ЭЫДҰ комитеттерінің мүшесі. IMD жаһандық бәсекеге қабілеттілік рейтингінде "Білім" субфакторы бойынша әлемнің 64 елінің арасында Қазақстан 26-шы орында. Осы рейтингтің 20 көрсеткішінің бестігінде Қазақстан бірінші орында тұр.

2019 жылғы Дүниежүзілік экономикалық форумның Жаһандық бәсекеге қабілеттілік индексінде  "Дағдылар" факторы бойынша Қазақстан 140 елдің ішінде 57-орынға ие болды. Сондай-ақ, 2019 жылы "WorldSkills International" халықаралық байқауында біздің құрама 14 орынды иеленді.

"Егер, PIRLS зерттеуінде мәтінді түсіну және оқу сауаттылығы бойынша біздің оқушылар 27 орында болса, TIMSS зерттеуіндегі математика және жаратылыстануда академиялық білім бойынша мықтылардың бірі және көшбасшы елдердің ондығына кіреді. PISA-2018 нәтижелері осы жылдың желтоқсанында белгілі болады", - деді Асхат Аймағамбетов.
PIRLS, TIMSS, PISA әр түрлі білім салалары мен түрлі жас ерекшеліктері үшін сауаттылық көрсеткіштері болып табылады. Егер, PIRLS бастауыш сынып оқушыларының сабақ үстінде оқыған материалды пайдалана білу қабілетін көрсетсе, TIMSS жаратылыстану-ғылыми және математикалық білімнің сапасын өлшейді. PISA жасөспірімдердің дағдыларын бағалайды.

2018 жылы Қазақстан TALIS халықаралық зерттеуіне алғаш рет қатысты. Бұл мектептердегі мұғалімдерді, директорларды және білім беру ортасын зерттеудің ең ауқымды түрі. Зерттеу нәтижелерін ЭЫДҰ елдерінің нәтижелерімен салыстыруға болады, кейбір позицияларда артықшылықтары бар. Мысалы, қазақстандық мұғалімдер ЭЫДҰ елдерінің көптеген мұғалімдерінен 3 жылға жас, орташа жасы-41 жас. ЭЫДҰ елдерінде-44. Қазақстан ең жас директорлары бар топ-7 елдің қатарына кіреді. Мұғалімдердің 86% кәсіби даму олардың оқытушылық практикасына оң әсерін тигізгенін айтты.

ҚР Парламент Мәжілісі төрағасының орынбасары Гүлмира Исимбаева Үкімет сағатында білім саласының қазіргі жағдайына тоқталғаны туралы осыған дейін хабарлағанбыз. Мәжіліс вице-спикері апаттық жағдайдағы және үш ауысымды мектептер мәселесін көтерді. Гүлмира Исимбаева білім гранттарының саны көбейгенімен игерілмей жатқанын айтты. Білім және ғылым министрі Асхат Аймағамбетов ҚР Парламент Мәжілісінде өтіп жатқан Үкімет сағатында мектепке дейінгі білім беру ұйымдары бағдарламасынан ағылшын тілін оқыту алынып тасталуы мүмкін екенін айтты.   


Фото: ашық дереккөз
Загрузка...