Нұр-Сұлтан, BAQ.KZ. 2020 жылдың ақпан айынан желтоқсан айына дейін республика бойынша Денсаулық сақтау министрлігінің Ұлттық сараптама орталығының зертханаларында коронавирустық инфекцияға 1,9 млн зерттеу жүргізілді, деп хабарлады «Ұлттық сараптама орталығы» баспасөз қызметі.
Оның ішінде 66 мыңнан астам сынама оң нәтиже берді. ҰСО зертханаларында орташа есеппен тәулігіне 5 мыңнан астам зерттеу жүргізілді.
Тестілеу 16 филиалда өткізілді. Аптасына жеті күн, тәулігіне 24 сағат республика бойынша 485 маман COVID-19 талдауларын зерттеуге жұмылдырылды.
Өткен жылғы пандемия кезінде дезинфекциялық қызметтер де үлкен жұмыс атқарды, демалыссыз, төтенше жағдай туындаған кезде тәулік бойы жұқпалы аурулардың ошақтарында дезинфекциялық жұмыстар жүргізді. Дезинфекциялау жұмыстары тұрғын және кеңсе үй-жайларында, ұшақтардың салондарында, карантиндік және провизорлық орталықтарға авиажолаушыларды тасымалдайтын автобустарда, сондай-ақ жолаушылардың багажында жүргізілді, - делінген ақпаратта.
Сондай-ақ, сауыққан науқастар мен олармен байланыста болған тұлғалар шығарылғаннан кейін стационарлар мен орталықтар дезинфекцияланды. Өткен жылдың 10 айында дезинфекциялық бөлімдердің 592 маманы 40 мыңға жуық ошақты өңдеді. Бүгінгі таңда ҰСО мамандары COVID – 19-ға зерттеулер жүргізуді және ошақтарды дезинфециялауды жалғастыруда.
