Бас жаңалықтар
Қазақстан елшісі Нидерланд Короліне сенім грамоталарын тапсырды
03 Желтоқсан 2020, 10:06 142

Қазақстан елшісі Нидерланд Короліне сенім грамоталарын тапсырды

Нұр-Сұлтан, BAQ.KZ. Қазақстан елшісі Асқар Жұмағалиев Нидерланд Королі Виллем-Александрға салтанатты түрде сенім грамоталарын тапсырды.

Бұл туралы ҚР СІМ баспасөз қызметі хабарлады. 

Рәсімнен кейін «Нордеинде» сарайында дипломаттың монархпен екіжақты кездесуі өтті, оның барысында тараптар Қазақстан мен Нидерланд арасындағы саяси, сауда-экономикалық ынтымақтастықты одан әрі нығайтуға бағытталған басым мәселелерді талқылады. 

Елші Ұлы мәртебелі Корольді Қазақстанның қазіргі сыртқы саясатымен және экономикалық бастамаларымен таныстырды. Ол сондай-ақ Президент Қасым-Жомарт Тоқаев Нидерландпен кешенді ынтымақтастықты дамытуға үлкен мән беретінін және жоғары деңгейдегі байланыстар екі ел арасындағы сенімді диалогтың берік негізін қалағанын атап өтті. 

Өз кезегінде Король Виллем-Александр екі ел арасындағы ынтымақтастықтың жоғары деңгейін айрықша атай отырып, Нидерланд Қазақстанмен саяси және экономикалық байланыстарды одан әрі өрбітуге мүдделі екенін белгілеп өтті. Ол сондай-ақ 2014 жылғы наурызда Гаагадағы Ядролық қауіпсіздік саммиті аясында Қазақстан Республикасының Тұңғыш Президенті Нұрсұлтан Назарбаевпен кездесуін еске түсірді. Дипломат Елбасының сол Форумда сөйлеген сөзінде Қазақстанның ядролық сынақ полигонын бірінші болып жауып, сонымен қатар ядролық қарудан ерікті бас тартқаны туралы айтқаны туралы қосты. Осыған орай, ол 2021 жылы Н. Назарбаевтың әлемдегі ең ірі Семей ядролық сынақ полигонын жабу арқылы қауіпсіз және орнықты әлемнің қалыптасуына ерекше үлес қосқан тарихи шешімінің 30 жылдығы атап өтілетіндігі туралы хабарлады.


Фото: дереккөз
Загрузка...