Бас жаңалықтар
Израильде әл-Фарабиге арналған ескерткіш тақта ашылды
PHOTO
16 Қыркүйек 2020, 13:22 90

Израильде әл-Фарабиге арналған ескерткіш тақта ашылды

Нұр-Сұлтан, BAQ.KZ. 15 қыркүйекте Хайфа қаласында Ұлы дала философы Әбу Насыр әл-Фарабидің туғанына 1150 жыл толуына орай оның есімімен аталатын көшеде ескерткіш тақтайшаның ашылуы өтті.

Бұл туралы СІМ баспасөз қызметі хабарлады.

photo5986946568676289350.jpg

Қазақстанның Израильдегі елшісі Сатыбалды Бұршақов жиналғандарға әл-Фарабидің ұлы мұрасы туралы және оның философия, медицина, құқықтану, психология, космология және басқа да салалардың дамуына қосқан үлесі туралы айтып берді. Сондай-ақ ол ескерткіш тақтаның ашылуы екі ел арасындағы мәдени байланысты одан әрі нығайта түсетініне тоқталды.

photo5409190759179070848.jpg

Хайфа қаласы мэрінің орынбасары Лазарь Каплун өз сөзінде әл-Фараби көшесіне орнатылған ескерткіш тақта қаладағы араб және еврей кварталдары түйіскен жерде орналасқанын және мәдениеттер бірлігін білдіретінін атап өтті.

photo5409190759179070847.jpg

Еврей зерттеушісі, Израиль Ашық университетінің докторы Ури Гершович тыңдаушыларға Тәураттың көрнекті аудармашыларының бірі раввин Моше бен Маймон өз шығармаларында әл-Фарабиді өзінің «рухани ұстазы» деп жиі атайтынын жеткізіп, қазақ және еврей халқының рухани байланысын еске түсірді, - делінген хабарламада.

Іс-шара қорытындысы бойынша елші Сатыбалды Бұршақов Хайфа мэрі Эйнат Калиш-Ротеммен кездесіп, экономикалық және мәдени байланыстарды талқылады.

Ынтымақтастықтың қалыптасқан деңгейі және Қазақстан мен Израиль арасындағы тауар айналымында Хайфаның рөлін ескере отырып, Хайфа мен Қазақстан қалаларының арасында бауырластық байланыс орнату туралы келісілді.

Іс-шараға қала әкімдігі, дипломатиялық корпус және ғылыми топтардың өкілдері, Хайфада оқитын қазақ студенттері қатысты.

Әл-Фараби көшесі 1960 жылы Хайфаның араб кварталында ашылған. Ол әйгілі Бахай бақтары мен Хайфа өнер мұражайына жақын маңдағы тарихи ауданда орналасқан. Оның ұзындығы 1,5 км құрайды.


Фото: дереккөз
Загрузка...