Бас жаңалықтар
Ішкі істер министрлігі мектептерді жаппай тексере бастады
14 Мамыр 2021, 21:27 993

Ішкі істер министрлігі мектептерді жаппай тексере бастады

Нұр-Сұлтан, BAQ.KZ. ІІМ білім беру мекемелерінде тексеруді бастады, деп хабарлайды Polisia.kz. 

Ішкі істер министрлігінде Білім беру ұйымдарында оқушылардың қауіпсіздігін қамтамасыз ету мәселелері бойынша кезектен тыс жедел кеңес өтті. 

Кеңес барысында министр Ерлан Тұрғымбаев ІІМ қызметтері мен аумақтық полиция департаменттерінің басшыларына барлық білім беру мекемесін бейнебақылау жүйелерімен, қызметкерлер мен келушілерді хабардар ету құралдарымен, дабыл түймелерімен, күзет сигнализациясымен және күзетпен жарақтандыруды тексеруді тапсырды. 

17 мамырда басталатын «Қару» жедел алдын алу іс-шарасы шеңберінде қару мен оқ-дәрілерді сатудың заңдылығын, оларды қару дүкендерінде, сондай-ақ атыс қаруының иелері болып табылатын заңды және жеке тұлғаларда қауіпсіз сақтау шарттарын тексеруді қамтамасыз ету тапсырылды. 

Сондай-ақ қатыгездік пен зорлық-зомбылықты насихаттау фактілерін анықтау және ден қою үшін интернет-кеңістіктің тұрақты мониторингі жүзеге асырылатын болады. 

Балалар – қоғамның ең осал бөлігі. Сондықтан олардың қауіпсіздігі әрқашан басымдыққа ие. Жергілікті атқарушы органдармен, білім беру мекемелерімен және азаматтармен бірлесіп біз балалардың мектептерде білім алып, ата-аналардың бала қауіпсіздігі туралы алаңдамауы үшін барлық қажетті шараны қабылдауға тиіспіз, – деді ІІМ басшысы Ерлан Тұрғымбаев.
Айта кетейік, 11 мамырда Қазан қаласында №175 мектеп гимназиясында белгісіз азамат мектеп ішінде атыс ұйымдастырды. Мектепте атыстан бөлек, жарылыс та болды. Салдарынан 10 шақты адам ажал құшып, 32 адам зардап шекті. Кейіннен атыс ұйымдастырған азаматтың кім екені анықталды. Ал қылмыскердің әпкесі оның қандай бала болғанын айтып берді.

Фото: ашық дереккөз
Загрузка...