Нұр-Сұлтан, BAQ.KZ. БҚО-ның Теректі ауданы орталығы Федоров ауылында карантин жарияланды. Бұл туралы аудандық тауарлар мен көрсетілетін қызметтердің сапасы мен қауіпсіздігін бақылау басқармасы хабарлады.
Басқарма мәліметіне қарағанда, күні бүгінге дейін аудан бойынша коронавирус жұқтырғандар саны 22-ге жетсе, соның 17-сі Федоров ауылында анықталып отыр.
Осыған байланысты аудандық бас санитар дәрігерінің 2020 жылғы 11 қыркүйектегі қаулысына сәйкес, 12 қыркүйектен бастап аудан орталығы аумағында карантин жарияланды.
Жасы 65-тен асқан адамдарға аса қажеттіліксіз көшеге шығуға шектеу қойылды.
Сондай-ақ бөлшек саудамен айналысатын дүкендерді қоспағанда, ірі азық-түлік және азық-түліктік емес базарлар, сауда желілері, қоғамдық тамақтандыру нысандары, спорт нысандары, саябақ, сквер және басқа демалыс орындарының қызметі тоқтатылды.
Жедел жәрдем, авариялық қызметтер және басқа да арнайы органдардың, Теректі ауданының тіршілігін қамтамасыз етуге жауап беретін ұйымдардың көлігін қоспағанда, кез келген көліктің қозғалысы сағат түнгі 23.00-ден таңғы 06.00-ге дейін шектеледі.
Карантин кезінде ұжымдық, отбасылық туған күн, үйлену тойы, құдалық, тағы басқа барлық жиындарға, көрші, туған-туыстарға баруға тыйым салынады.
