Бас жаңалықтар
Елордадағы жарылысқа қатысты қосымша ақпарат пайда болды
23 Қараша 2020, 13:58 670

Елордадағы жарылысқа қатысты қосымша ақпарат пайда болды

Нұр-Сұлтан, BAQ.KZ. ҚР ТЖМ баспасөз қызметі елордадалық дәмханада орын алған газ баллонның жарылысы бойынша қосымша ақпарат таратты.

2020 жылғы 21 қарашада сағат 12.25-те Нұр-Сұлтан қаласы ТЖД кезекші-диспетчерлік қызметінің пультіне Шұбар шағын ауданындағы «Halalbrothers» дәмханада  газ баллон жарылғаны, салдарынан өрт шыққаны  туралы хабарлама түскен болатын.

Өрт сөндірушілер оқиға орнына сағат 12.32-де келген бойда жарылыс салдарынан екі қабатты коттеджге жапсарлас салынған құрылыс пен қазандықтың ішінара қабырғалары және шатыры құлағаны анықталды. Сонымен қатар 20 шаршы метр көлемде жапсарлас салынған құрылыс пен қазандықтың шатыры жанған. Қирау 100 шаршы метр көлемде орын алған (құрылыстың жалпы көлемі 600 шаршы метр). Жарылыс салдарынан ас үйдің шатыры құлаған.

Елордалық құтқарушылар оқиға орнынан 35 газ баллонды шығарды. Үйіндінің арасынан 1998 жылы туған  қызды құтқарды, ол жабық бас ми зақымын алған. Өкінішке орай, оқиға орнында дәмханада ыдыс жуушы болып қызмет атқаратын 1968 жылы туған әйел адам қаза тапты. 

Жедел медициналық көмек бригадасы 34 адамды емханаға жеткізді. Оның ішінде 11-і дәрігер қарағаннан кейін  үйлеріне жіберілді, 23-і ауруханаға жатқызылды. Зардап шеккен адамдардың барлығы дәмхана жұмысшылары. Сондай-ақ жарылыс салдарынан 3 автокөлік зиян келтірілді.

Көлемі 20 шаршы метр өрт сағат 12.58-де сөндірілді. Авариялық-құтқару жұмыстары сағат 16.59-да аяқталды. Өрттің шығу себептері анықталуда. 

Оқиға орнында Нұр-Сұлтан қаласы ТЖД, Апаттар медицинасы орталығының 56 қызметкері мен 14 бірлік техникасы жұмыс жасады. 

Қала әкімдігі және ТЖ департменті адамдар тоңып қалмас үшін КУНГ-көлігі мен автобус жіберілді.

Оқиға орнында халыққа психологиялық көмек беру және ақпараттық қолдау үшін қауырт желі телефоны жұмыс істеді 8-7172-24-51-71 и 8-7172-24-51-47. Оған 11 қоңырау түсті.

Жалпы ТЖ-ны жоюға Нұр-Сұлтан қаласы ТЖД, Апаттар медицинасы орталығынан, Полиция департаментінен, жедел медициналық көмек бригадасынан және жергілікті атқарушы органдардан 172 қызметкер мен 56 бірлік техника жұмылдырылды.


Фото: дереккөз
Загрузка...