Нұр-Сұлтан, BAQ.KZ. Елордада Боталы көшесінде орналасқан көпқабатты тұрғын үй өртеніп жатыр. Алдын ала мәліметтер бойынша, тұрғын үй кешенінің бірқатар қабаттарында лифт шахтасындағы электр кабелі жанған.
Төтенше жағдай 19 қарашада, жұма күні болды. Сағат 15:29-да Төтенше жағдайлар департаментінің Өрт сөндіру бөлімшелері өрт туралы хабарлама алып, Боталы көшесі 26 мекенжайы бойынша оқиға орнына барды.
Өрт сөндірушілер келген соң 6 минуттан кейін «Европейский» тұрғын үй кешенінің 18-қабатында, №1 кіреберісте 10-нан 14-қабатқа дейінгі шахтада электр кабельдері жанғаны анықталды. Қазіргі уақытта адамдарды эвакуациялап жатыр, - деп хабарлады елордалық ТЖ департаментінің баспасөз қызметі.
Өрт сөндіру жұмыстарына департаменттің жеке құрамынан 22 адам мен алты техника жұмылдырылды.
Куәгерлердің айтуынша, үйден адамдар көмек сұрап, айқайлаған дауыстары естілген. Әзірге қаза болғандар мен зардап шеккендер туралы ақпарат жоқ.
