Еліміздегі ақылы жолдардан 4 млрд теңгеден астам қаражат жиналды

13 Қараша 2019, 20:52
8085
Бөлісу:
Еліміздегі ақылы жолдардан 4 млрд теңгеден астам қаражат жиналды

Нұр-Сұлтан, BAQ.KZ.Қазақстанда ақылы жолдардан 4 млрд теңгеден астам қаражат жиналды. Бұл туралы Индустрия және инфрақұрылымдық даму министрлігі хабарлады.

Ведомствоның айтуынша, қазіргі уақытта елімізде төрт ақылы учаске жұмыс істейді: Нұр-Сұлтан – Щучинск, Нұр-Сұлтан – Теміртау, Алматы – Қорғас, Алматы – Қапшағай. Бұл жолдардың жалпы ұзындығы 682 км құрайды.

2019 жылдың басынан бастап 2019 жылдың 1 қарашасына дейін алымдар 4,3 млрд теңгені құрады. Атап айтқанда, қазақстандықтар Нұр-Сұлтан – Щучинск автожолы бойынша жол жүргені үшін 1,4 млрд теңге, Нұр-Сұлтан – Теміртау – 1,4 млрд теңге, Алматы – Қапшағай – 798,7 млн теңге, Алматы – Қорғас – 701,8 млн теңге төледі, – делінген хабарламада.

Айта кетейік, 2020 жылдан бастап «Батыс Еуропа – Батыс Қытай» дәлізінде инвестор қаражаты есебінен ақы төлеуді енгізу жоспарланып отыр. Атап айтқанда, Щучинск – Петропавл, Омбы – Павлодар және Нұр-сұлтан – Қостанай – Ресей шекарасы учаскелері ақылы болады. Бұл ретте министрлік ақылы жолдардан күтілетін алым жыл сайынғы техникалық қызмет көрсетуді, сондай-ақ инвесторлардың шығындарын өтейтіндігін атап өтті.

Сонымен қатар, "Батыс Еуропа – Батыс Қытай" дәлізін қайта жаңарту 794,7 млрд теңгені құрады. Сондай-ақ, министрлік жалпы 2020 жылдан 2023 жылға дейін 11 мың шақырым республикалық маңызы бар автомобиль жолдарында ашық жүйені енгізу жоспарланғанын мәлімдеді.

Өзгелердің жаңалығы