Декларация тапсыру мерзімі аяқталуда – Кірістер комитеті

9 Қыркүйек 2021, 16:19
1443
Бөлісу:
Декларация  тапсыру мерзімі аяқталуда – Кірістер комитеті

Нұр-Сұлтан, BAQ.KZ. Жеке тұлғаның активтері мен міндеттемелері туралы декларациясын тапсыру мерзімінің аяқталуына 7 күн қалды. Электронды түрде декларацияны осы жылдың 15 қыркүйегінен кешіктірмей тапсыру қажет. Бұл туралы ҚМ Мемлекеттік кірістер комитеті хабалады.

2021 жылдың 1 қаңтарынан бастап елімізде жалпыға бірдей декларацияны енгізудің бірінші кезеңі басталған болатын. Жалпыға бірдей декларациялауды енгізу төрт кезеңмен жүргізіледі.

Бірінші кезеңде (2021 жылдың 1 қаңтарынан бастап) активтер мен міндеттемелер туралы декларацияны ұсыну бойынша міндеттемелер жауапты мемлекеттік лауазымды атқаратын адамдар мен олардың жұбайлары; мемлекеттік функцияларды орындауға уәкілеттік берілген адамдар мен олардың жұбайлары; мемлекеттік функцияларды орындауға уәкілеттік берілген адамдарға теңестірілген адамдар мен олардың жұбайлары (зайыптары); ҚР «Қазақстан Республикасындағы сайлау туралы» Конституциялық Заңына және ҚР «Сыбайлас жемқорлыққа қарсы іс-қимыл туралы», «Қазақстан Республикасындағы банктер және банк қызметі туралы», «Сақтандыру қызметі туралы», «Бағалы қағаздар нарығы туралы» заңдарына сәйкес декларация табыс ету міндеті жүктелген тұлғаларда туындады, - деп хабарлады МКК-де.

Жалпыға бірдей декларациялаудың бірінші кезеңінің декларациясын қағаз түрінде ұсыну мерзімі 2021 жылғы 15 шілдеде аяқталған болса, электронды түрде 2021 жылғы 15 қыркүйекте аяқталады.

Активтер мен міндеттемелер туралы декларацияны электронды түрде Салық төлеушінің кабинеті (cabinet.salyk.kz), «Электронды үкімет» порталы (egov.kz) арқылы, сондай-ақ «e-Salyq Azamat» және «eGov mobile» мобильді қосымшалары арқылы тапсыруға жағдай жасалған.

Активтерді декларациялауға қатысты сұрақтар туындаған жағдайда мемлекеттік кірістер органдарына немесе 1414 нөмірі бойынша, қосымша 3 нөмірін тере отырып, байланыс орталығына хабарласуға болады, - деп атап өтті МКК-де.

Сондай-ақ, ҚМ Мемлекеттік кірістер комитетінің ресми сайтында (kgd.gov.kz) «Жалпыға бірдей декларациялау» бөлімінде толық ақпаратты алуға болады.

Активтер мен міндеттемелер туралы декларацияны белгіленген мерзімде ұсынбаған жағдайда, әкімшілік жауапкершілік көзделген. Бірінші рет уақытылы тапсырылмағаны үшін  ескерту жасалады, егер осыдан кейін бұзушылық бір жыл ішінде қайталап жасалса – 15 АЕК мөлшерінде айыппұл салынады.

Активтер мен міндеттемелер туралы декларацияда толық емес, анық емес мәліметтерді ұсыну үшін де әкімшілік жауапкершілік қарастырылған. Егер аталған бұзушылық бірінші рет жасалып, салықтардың есептелуіне әкеп соқпаса, онда ескерту жасалады. Ал егер осындай бұзушылық ескерту жасалғаннан кейін бір жыл ішінде қайталанса, онда 3 АЕК мөлшерінде айыппұл салынады. 


 

Өзгелердің жаңалығы