Биыл Алматыда 1 291 бизнес-жоба субсидияланды
27 Қазан 2021, 13:23 27782

Биыл Алматыда 1 291 бизнес-жоба субсидияланды

Алматы, BAQ.KZ тілшісі. Алматыда кәсіпкерлікті табысты дамыту үшін барлық жағдай жасалған. Карантин аясында ШОБ қолдау жөніндегі мемлекеттік бағдарламалар бұрынғыдан да өзекті. Бұл туралы «Даму» кәсіпкерлікті дамыту қоры АҚ Алматы қаласы бойынша өңірлік филиалының директоры Светлана Назарюк Өңірлік коммуникациялар қызметі алаңында өткен брифингте айтты.

С. Назарюктің айтуынша, пандемия Қор қызметтерін цифрландыру процесін жеделдетті.

Шағын және орта бизнес үшін мемлекеттік қолдау барынша қолжетімді, ыңғайлы және жылдам болуға ұмтылады. Ол үшін барлық бизнес-процестер цифрландырылады және автоматтандырылады. Қазіргі уақытта бизнес-процестердің 94%-ы автоматтандырылған. «Даму» е-Gov порталында қаржылық қызметтерді ұсынатын алғашқы квазимемлекеттік компания, - деді ол.

2019 жылы Қор өзінің Online-Damu платформасын іске қосқан. Барлық өтінімдер онлайн режимде қабылданады. Субсидиялау шарттарына электрондық тәсілмен де қол қоюға болады. Мұндай цифрландыру клиенттер үшін ыңғайлы болып қана қоймай, процестердің ашықтығына кепілдік беруге мүмкіндік береді, бірақ ол Қордың өзіне де пайдалы, өйткені ол қызметкерлердің уақыт шығындарын айтарлықтай қысқартуға мүмкіндік береді және, ең бастысы, қаражатты үнемдейді.

С. Назарюк атап өткендей, 2021 жылдың 9 айында жалпы несие сомасы 130,04 млрд теңге болатын 1 291 жоба бойынша субсидиялау шартына қол қойылған және15,3 млрд теңгенің субсидиясы төленіпті. Бұл өткен жылмен салыстырғанда тоғыз есе көп.

Алматы қаласы несиелендіру сомасы бойынша өңірлер арасында көшбасшы орынға ие, оның ішінде несиелер/микрокредиттер бойынша сыйақы мөлшерлемесінің бір бөлігін портфельдік субсидиялау шеңберінде 4,17 млрд теңге несие сомасына 806 жобаға, ал екінші бағыт шеңберінде 125,87 млрд теңге сомасына 485 жаңа жобаға қолдау көрсетілді, - деді С. Назарюк.

«Даму» Қоры филиалының директоры пандемия кезінде зардап шеккен ШОБ субъектілеріне субсидия беру аясында Алматыда бірінші толқын аясында 1,5 млрд теңге сомасына 825 шартқа; екінші толқын аясында – 570 млн теңге сомасына 273 шартқа; үшінші толқын бойынша – 428 млн теңге сомасына 337 шартқа қол қойылғанын айтты. Барлығы 2,5 млрд теңгеге 1 435 келісімшарт жасалды.

Президент Қ.Ж. Тоқаевтың тапсырмаларын орындай отырып, «Даму» Қоры 2021 жылдың 9 айында жалпы несие сомасы 24 386 млн теңгеге 879 кепілдік берді, кепілдік сомасы 11 082 млн теңгені құрайды. Қаржыландырылған жобалардың құрылымында өңдеу өнеркәсібі, көлік және қоймалау, сондай-ақ қызмет көрсету салалары басым.

«Қарапайым заттар экономикасы» бағдарламасы (басым жобаларды кредиттеу тетігі) аясында ағымдағы жылы Алматыда 20 млрд теңгеден астам сомаға 20 жоба қолдау алды, олардың ішінде өңдеу өнеркәсібі саласындағы кәсіпорындар басым.


Фото: дереккөз
Загрузка...