Нұр-Сұлтан, BAQ.KZ. Бұл туралы билеуші партия төрағасының бірінші орынбасары Бауыржан Байбек Facebook желісіндегі парақшасында айтты.
Осынау күрделі кезеңде өз жақындары мен туыстарынан айрылған барша жанға қайғыларына ортақтасып, көңіл айтамын. Өкінішке қарай, әлемнің көптеген елімен қатар Қазақстан да COVID-19 ауруы жылдам таралып отырған мемлекеттер тізіміне енді. Қалыптасқан ахуалды ескеріп, кеше Мемлекет басшысы Қасым-Жомарт Тоқаев коронавируспен күрес шараларын күшейту туралы мәлімдеді. Олардың қатарында лабораторияларды жете жарақтандыру, төсек-орындар мен ПЦР-тесттер санын арттыру шаралары қамтылған. Осы қиын жағдайды пайдаланып, пайдаға кенеліп қалғысы келетіндерге қатысты қатаң шаралар қабылданады. Бұл осындай күрделі кезең ішінде ел арасында үрей туғызып, әлеуметтік алауыздықты қоздырушыларға қатысты болмақ. Жалпы, дәрі-дәрмек, өкпені жасанды желдету аппаратын сатып алуға, медицина қызметкерлерін ынталандыруға және басқа да шұғыл шараларға кемінде 150 млрд теңге бағытталады. Ендігі мәселе – осы шаралардың атқарушы органдар тарапынан орталықта және өңірлерде тиімді іске асырылуы, - деп жазды ол.
#BizBirgemiz республикалық акциясы аясында қарқынды жұмыс жүргізу жалғасатынын атап өтті.
Ел Президенті жариялаған шараларды қолдай отырып, біз #BizBirgemiz республикалық акциясы аясында қарқынды жұмыс жүргізуді жалғастырамыз. Елбасы, партия лидері Нұрсұлтан Назарбаевтың тапсырмасымен өңірлік филиалдардың жұмысы мұқтаж азаматтарға атаулы көмек көрсетуге бағдарланды. Қоғамдық қабылдаулар онлайн режимде қызу жұмыс жүргізуде, - деді Бауыржан Байбек.
Қазіргі кезде қазақстандықтардың халқымыздың басына түскен сынаққа барынша сабырлық, төзімділік пен жауапкершілік танытуы маңызды деп атап өтті ол.
Елбасының бастамасымен соңғы 3 айда 550 мыңнан астам аса мұқтаж отбасыға, яғни отбасылық коэфициентін ескергенде 2 миллиондай адамға атаулы қаржылық көмек көрсетілді. Тағы 300 мыңдай отбасы азық-түлік себеттерімен және қажетті тауарлармен қамтамасыз етілді. Сондай-ақ 100 мың отбасыға 5 миллион маска таратылды. Осынау ауқымды жұмысқа Jas Otan-ның 5 мыңнан астам волонтері атсалысты. Мемлекет басшысы үндеуінде атап көрсеткендей, қазіргі кезде қазақстандықтардың халқымыздың басына түскен сынаққа барынша сабырлық, төзімділік пен жауапкершілік танытуы маңызды. Ел Президентінің жанына топтаса отырып, бірлігімізді көрсететін кез - осы. Тек жұдырықтай жұмыла отырып қана бұл қатерді еңсереміз. Nur Otan партиясы өзінің бүкіл ресурсын Мемлекет басшысының тапсырмаларына қоғамдық және партиялық бақылауды қамтамасыз етуге жұмылдырады, - деп жазды Байбек.
