Бас жаңалықтар
Қазақстанның Бельгиядағы Елшісі Еуропалық кеңестің Президентіне сенім грамоталарын тапсырды
25 Қаңтар 2019, 17:48 723

Қазақстанның Бельгиядағы Елшісі Еуропалық кеңестің Президентіне сенім грамоталарын тапсырды

Астана, BAQ.KZ. Брюссельде Қазақстанның Елшісі Айгүл Құспан Еуропалық кеңестің Президенті Дональд Тускқа сенім грамоталарын тапсырды. Бұл туралы ҚР Сыртқы істер министрлігінің баспасөз қызметі мәлімдеді.

Ресми рәсімнен кейін Қазақстан-Еуропа қарым-қатынастарының қазіргі ахуалы мен болашағы туралы пікір алмасылды.

Д. Туск Қазақстанның және Президент Нұрсұлтан Назарбаевтың жақсы досы екенін атап өтті.

«Біз Қазақстан Президентінің халықаралық істердегі рөлін, соның ішінде Сирия бойынша Астана процесінің аясында бітімгершілік күш-жігерін жоғары бағалаймыз», - деді ол.

Тараптар Мемлекет басшысының Брюссельде «Еуропа-Азия» 12-ші форумы аясында айтқан бастамасын талқылады. Бұл бастама халықаралық қауіпсіздіктің өзекті мәселелерін талқылау үшін Астанада БҰҰ-ның арнайы сессиясын немесе АҚШ, Ресей, Қытай және Еуропалық Одақ көшбасшыларының қатысуымен кездесуді өткізуді қарастырады.

«ЕО - Қазақстанның ең ірі сауда әріптесі болып табылады. Қазақстан өзінің географиялық жағдайы арқасында ғана емес, сондай-ақ Президенттеріңіздің зор қуаты нәтижесінде, аймақта стратегиялық рөл атқарады. Сондықтан біз ынтымақтастықты дамытуымыз керек», - деді Еуропалық Кеңестің Президенті.

А. Құспан еліміз Қазақстан мен Еуропалық Одақ арасындағы Кеңейтілген серіктестік және ынтымақтастық туралы келісіміне үлкен үміт артып отырғанын атап өтті. Аталған келісім ең алдымен жоғары технологиялық өндірістер арқылы сауданы және инвестиция көлемін айтарлықтай арттыруға, экономикалық өсімін күшейту үшін жаңа жұмыс орындар ашуға жаңа мүмкіндіктер туғызатынын мәлімдеді.

Еуропалық Кеңестің Президенті Президент Н.Назарбаевқа өзінің ең жақсы тілектерін жеткізді және Қазақстанға сапармен баруға ниет білдірді.

ЕО біздің еліміздің ең ірі сауда әріптесі болып табылады. 2017 жылы ЕО елдерімен сауда айналымы 30 млрд. АҚШ долларын құрады, ЕО-ң Қазақстанның жалпы тауар айналымындағы үлесі 49,8% құрады. Өткен жылдың қаңтар-қыркүйек айларында сауда айналымы 28,56 млрд долларын құрады.

2017 жылы Еуропалық Одақтың Қазақстан экономикасына тартылған тікелей шетелдік инвестициялары 9,8 млрд долларға жетті, бұл елге тартылған инвестициялардың жартысы болып табылады.

Сізден жаңалық