Нұр-Сұлтан, BAQ.KZ. Қазақстан Республикасының Түрікменстандағы елшісі Еркебұлан Сәпиевті сенім грамоталарын табыстау үшін Түрікменстан президенті Гурбангулы Бердімұхамедов қабылдады, деп хабарлады ҚР Сыртқы істер министрлігінің баспасөз қызметі.
«Оғызхан» сарайында өткен кездесу барысында Түрікменстан басшысы бауырлас елдер арасында қалыптасқан достық қарым-қатынастар мен өзара сенім ахуалын, сондай-ақ өңірлік және жаһандық күн тәртібіндегі негізгі мәселелер бойынша екі мемлекеттің ынтымақтастығын атап өтті. Бұл ретте, ол Қазақстанның Тұңғыш Президенті – Елбасы Нұрсұлтан Назарбаевтың екіжақты қарым-қатынастардың қалыптасуына және Қазақстан-Түрікмен стратегиялық серіктестігінің дамуына қосқан зор үлесіне ерекше назар аударды", - делінген хабарламада.
Тараптар саяси-дипломатиялық диалог, сауда-экономикалық ынтымақтастық, екі ел арасындағы ғылыми-техникалық пен мәдени-гуманитарлық өзара әрекеттестікті дамытуды қоса алғанда, бірқатар өзекті мәселелерді талқылады.
Кездесу соңында Г.Бердімұхамедов Елбасы Н.Назарбаев және Қазақстан Президенті Қ.Тоқаевқа жүрек жарды тілегін жеткізіп, елшіге Қазақстан-Түрікмен ынтымақтастығын нығайту үшін табысты және жемісті жұмыс тіледі.
Сол күні қазақстандық елші Сенім грамоталарының көшірмелерін табыстау үшін Түрікменстанның Министрлер Кабинеті Төрағасының орынбасары – Сыртқы істер министрі Рашид Мередовпен кездесті.
