Ауғанстан президенті Тоқаевты ел басқару қызметіне ресми кірісуімен құттықтады

13 Маусым 2019, 20:29
1352
Бөлісу:
Ауғанстан президенті Тоқаевты ел басқару қызметіне ресми кірісуімен құттықтады
Фото: Бауыржан ЖУАСБАЕВ

Нұр-Сұлтан, BAQ.KZ. Қасым-Жомарт Тоқаев Ауғанстан Ислам Республикасының президенті Мұхаммед Ашраф Ғанимен кездесті, деп хабарлады Ақорданың баспасөз қызметі.

Мемлекет басшысы Ауғанстан Ислам Республикасының президентіне ілтипат білдіріп, екіжақты ынтымақтастықтың және көпжақты форматтағы өзара тығыз іс-қимылдардың жоғары деңгейде екенін атап өтті.

"Президент мырза, Сізбен Шанхай ынтымақтастық ұйымының саммиті аясында Бішкек қаласында кездескеніме қуаныштымын. Біздің елдеріміз ынтымақтастықта мол табысқа қол жеткізді. Алдағы уақытта өзара ықпалдастығымызды кеңейту арқылы бұдан да жақсы нәтижелер күтемін", - деді Қасым-Жомарт Тоқаев. 

Мұхаммед Ашраф Ғани Қасым-Жомарт Тоқаевқа кездесуге мүмкіндік жасағанына ризашылық білдірді. Мемлекет басшысын президент сайлауындағы жеңісімен және Қазақстан президенті қызметіне ресми кірісуімен құттықтады. Ауғанстан көшбасшысы Қазақстан халқының өз таңдауы арқылы елдің стратегиялық бағдарының сабақтастығын таңдағанын атап өтті.

Кездесу соңында Қасым-Жомарт Тоқаев Мұхаммед Ашраф Ғанидың қызметіне табыс тіледі.   

Бұған дейін Қазақстан президенті Қасым-Жомарт Тоқаев пен Қырғызстан Республикасының президенті Сооронбай Жээнбековпен кездескенін хабарлаған болатынбыз.

Өзгелердің жаңалығы