Бас жаңалықтар
Салт аттылар клубының маусымашар сапары өтеді
03 Маусым 2020, 21:20 435

Салт аттылар клубының маусымашар сапары өтеді

Нұр-Сұлтан, BAQ.KZ тілшісі. "QazaqGeography" республикалық қоғамдық бірлестігі мен At-travel.kz клубының ұйымдастыруымен 2020 жылдың 5-7 маусым аралығында Қорғалжын-Бозоқ бағытында салт аттылар сапары өтеді.

Жобаның басты мақсаты - биылғы коронавирус індеті жағдайында еліміздің ішкі туризмін насихаттау, Қазақстанның тарихи жерлерін таныстыру арқылы жылқы туризміне қызығушыларға мүмкіндік жасау. Атқа міну мәдениеті – қазақ халқының қанына сіңген, өмірлік серігіне айналған үрдіс. Экспедиция нәтижесінде еліміздің табиғи нысандары бойынша жаңа туристік бағыттар жасалып, GPS координатаға жаңа нүктелер түсірілетін болады - дейді ұйымдастырушылар.

At-travel.kz клубы мүшелері қатысатын бұл сапар клубтың биылғы жылғы маусымашар сапары болмақ. Үш күнге жалғасатын сапар барысында Қорғалжын табиғи қорығының аумағын аралау, 120 шақырымға созылатын Қорғалжын-Бозоқ бағытын атпен жүріп өту жоспарланған. 

Сапарға At-travel.kz клубының басшысы Берік Ақылбеков жетекшілік етеді.

Сонымен қатар салт аттылар сапарына Қанат Бейсеков (Ақмола облысы), Сергей Корносенков (Мәскеуден), Темірбек Аманжол (елорда), Қайрат Әділкешов (елорда), Дидар Оралбекұлы (ШҚО-дан), Мерген Тоқсанбай (Ақмола облысынан), Ержан Жаубай (елорда) қатарлы азаматтар қатысады.

Естеріңізге сала кетейік, At-travel.kz клубы мүшелері өткен жылы Нұр-Сұлтан – Баянауыл бағытында 500, Нұр-Сұлтан – Қорғалжын бағытында 120, Теңдік (Павлодар облысы) – Бұқар жырау кесенесі бағытында 50, Нұр-Сұлтан – Қабанбай батыр кесенесі бағытында 50 шақырым жол жүрген болатын.

Биыл клуб мүшелері алдағы уақытта Абай Құнанбайұлының 175 жылдығына орай Нұр-Сұлтан – Жидебай бағытына 1000, Алтын Орданың 750 жылдығына орай Ұлытау – Нұр-Сұрсұлтан бағытына 750 шақырым жол жүруді жоспарлап отыр.

Салт аттылар сапарының ақпараттық серіктесі Argymaq.kz ұлттық танымдық порталы мен BAQ.KZ ақпарат агенттігі.


Фото: автордан
Загрузка...