Бас жаңалықтар
«Арыстан патша» кинотуындысы қазақша сөйледі
18 Шілде 2019, 12:30 525

«Арыстан патша» кинотуындысы қазақша сөйледі

Нұр-Сұлтан, BAQ.KZ тілшісі. 18 шілде күні Қазақстанда көптен күткен Disney ремейкі «Арыстан патша» кинотуындысы прокатқа шығады. Осы орайда 17 шілде күні Нұр-Сұлтан, Алматы және Шымкент қалаларында кинотуындының жабық көрсетілімі өтті. 

Фильм «Болашақ» корпоративтік қоры және «Меломан» компаниясының бастамасымен «Өзіңнен баста» жобасының аясында дубляждалған. Дубляж демеушісі BI Group компаниясы. Жоба Nur Otan партиясы мен Алматы қаласы әкімдігінің қолдауымен жүзеге асырылды.  

IMG_7689 (1).JPG

«Бүгін көптен күткен «Арыстан патша» анимациялық фильмінің алдын ала көрсетілімі болды. Бұл «Өзіңнен баста» жобасы аясындағы 31-көрініс. Қазақша дубляждың демеушісі BI Group компаниясына алғыс білдірем және «Болашақ» корпоративтік қоры мен BI Group компаниясы Walt Disney Pictures, Pixar және Sony Pictures компанияларының тағы жеті фильмін дубляждауға 2020 жылға арналған меморандумға қол қойғаны жайлы жариялаймын», - деді «Болашақ» корпоративтік қоры қамқоршылық кеңесінің төрағасы Динара Чайжунусова.

Динара Чайжунусова «Өзіңнен баста» жобасы мемлекеттік қаржыны тартпайтынын, қазақстандық жеке компаниялар мен меценаттардың демеушілігімен ғана жүзеге асырылатынын атап өтті.

«Қазіргі таңда кинотеатрларда қазақ тіліндегі фильмдер прокатының ыңғайсыз уақыты туралы шағымдар келіп түсуде. 2018 жылы Қор қолданыстағы заңнамада көрініс таппаған сала субъектілері үшін салықтық преференцияларды қоса алғанда, кинотеатрлардағы аудиториялар үшін қазақ тіліндегі контенттің тең қол жеткізуіне қатысты «Кино туралы» заң жобасына ұсыныстар енгізді. Менің ойымша, бұл бағыттағы жұмысты қазақ тілі мен мәдениетін дамыту саласындағы уәкілетті орган ретінде Қазақстан Республикасы Мәдениет және спорт министрлігі қолдап, жалғастыруы керек», - деді Чайжунусова.
Король лев каз постер гориз (2).jpg

Aray Media Group студиясының негізін қалаушы, продюсер Айгүл Қыдырғалиқызы анимациялық туындыны дубляждау процесі туралы айтып берді.

«Арыстан патша» Disney-дің ең үздік он туындыларының ішіне кіреді. Бұл жобаны бүкіл әлем күтіп отыр. Бізге де дүниежүзімен бірге туындыны тамашалау бағы бұйырып тұр. «Арыстан патша» туындысы 1994 жылы 25 жыл бұрын көрсетілді. Көптеген үлкен марапаттарға ие болды. Біз де дубляжға келген кезде ең керемет актерларды алдық. Тіл мамандарының жұмысы өте үлкен. Ағылшын тілінен тікелей аударып, қазақ тіліне бейімдеу және айналдыру процесі жүрді. Мысалы, Scar (кейіпкер есімі – авт.) дегенді орысша аударғанда «шрам» болады, ал қазақша – «тыртық». «Тыртық» деген жағымсыз, контексті игермейді. Ұжыммен ұзақ ойлана келе режиссердің ұсынысы «Ызғар» деп қойдық. Ызғар ол қанішер, қатыгездікпен ақылдылық үйлесімін тапқан ызғар мен арыстанның ырылы бар. Симбаның әкесі Муфасаның аузына қазақтың мақал-мәтелдерін салдық. Тимон мен Пумбада тамаша қазақы қалжыңдар болды», - деді продюсер.

IMG_7677.JPG

Ал дубляж режиссері Шах-Мұрат Ордабаев дыбыстауға шамамен 50-55 күн кеткенін, мәтінмен жұмыс, аудару ең ұзақ уақыт алғанын айтты. 
«Кастинг Алматы, Астана қалаларында өтті. Осы жолы кастингке театр актерлері ғана емес, кино актерлері қатысты. Музыкалық туынды болғандықтан өте көп жұмыс атқарылды. Екі аптаның өзі музыканы жазуға кетті», - дейді ол. 

Синопсис:
Махаббат пен достық, адалдық пен билік үшін күрескен Африкалық Саваннаның мекен етушілері туралы Disney-дің анимациялық кинотуындысы. Аңдардың патшасы Муфасаның мұрагері Симба дүниеге келеді. Фильм мұрагердің тынымсыз еркеден бақытсызға жанға дейінгі, бейқам кезбеден құтқарушы мен барлық аңдардың әміршісіне дейінгі бұралаңға толы өмір жолын баяндайды. 

IMG_7634.JPG
Қызықты деректер:

- Танымал қазақстандық әнші Маржан Арапбаева қазақ тіліндегі фильмнің басты саундтрегін орындады;

- Әнші Бейонсе орындаған арыстан Наланың «Алға» әнін «X-Factor» тележобасының жеңімпазы Дария Габдулл шырқады;

- Маймыл Рафикидің рөлін сомдаған Қазақстандық актер «суахили» тілінде сөйледі;

- Фильмнің кастингіне Нұр-Сұлтан және Алматы қалаларынан 50-ден астам актерқатысты;

- «Симба» арыстан, «Сараби» — сағым, «Рафики» — дос, «Пумба» — аңқау, «Шензи» — дөрекі дегенді білдіреді;

- Муфаса — ағылшындардың отарлауының алдында Кенияны мекендеген халықтың соңғы патшасының есімі.

Қазақстандық премьера: 2019 жылғы 18 шілдеде;

Шығарушы: Walt Disney Pictures студиясы;

Режиссёр: Джон Фавро;

Продюсерлер: Джон Фавро, Карен Джонсон, Джеффри Сильвер;

Композитор: Ханс Циммер;

Фильмнің ұраны: «Патша оралды».

Дубляж туралы ақпарат:

«Болашақ»корпоративтік қоры және «Меломан» компаниясының бастамасымен «Өзіңнен баста» жобасының аясында дубляждалған;

Дубляждау студиясы: «Aray Media Group»;

Қазақша дубляждың режиссері: Шах-Мұрат Ордабаев;

Дыбыс режиссері: Диас Лес Тегі, Абылай Энгельсов;

Аудармашы: Әсел Мамырова;

Мәтіндерді салушы: Сауртаева Гүлжан;

Редактор: Еркебұлан Әбдірахманов;

Музыкалық жетекші: Анель Токирова;

Қазақ тіліне дубляждалған 31-ші фильм;

Дубляждың демеушісі: BI Group.

Рөлдерді дубляждаған: Бекболат Құрманғожаев (Mufasa), Бекнұр Ыбырай (Young Simba), Олжас Жақыпбек (Simba), Алтынай Нөгербек (Sarabi), Динар Қалдыбек (Young Nala), Наурыз Сабағатова (Nala), Сая Тоқманғалиева (Shenzi), Болат Ыбыраев (Rafiki), Жәнібек Мұсаев (Pumbaa), Дәурен Серғазин (Timon).

Жоба туралы:

«Өзіңнен баста» — голливудтық фильмдерді қазақ тіліне дубляждауға бағытталған жоба. «Болашақ» корпоративтік қоры және «Меломан» компаниясының бастамасымен 2011 жылдан бастап жүзеге асырылуда. Әлеуметтік және коммерциялық мақсаттарды көздемейді.

«Өзіңнен баста» жобасы аясында қазақ тіліне Голливудтың 31 кинотуындысы дубляждалды, олардың ішінде: «Тачки-2»/»Көліктер 2», «Мстители-2: Эра Альтрона»/ «Кек алушылар: Альтрон дәуірі», «Храбрая сердцем»/ «Батыл жүрек», «Тайна Коко»/ «Коко құпиясы», «Моана», «Малефисента», «Аладдин», «История игрушек-4»/ «Ойыншықтар хикаясы-4» және басқалары. Барлығы: «Walt Disney Pictures»/ «Pixar» студияларының 15 анимациялық фильмдері және Sony Pictures, Disney, Lucasfilm Ltd және Marvel Studios Inc. студияларының отбасымен көруге арналған 16 фильмі бар. Жобаның арқасында 100-ден астам отандық актер Walt Disney Pictures дауыстар базасына енгізілген. Қазақ тілі түрік тілінен кейінгі дубляждалатын екінші түркі тілі.


IMG_7159 (1).JPG


Walt Disney компаниясының тарихындағы 39-шы және Sony Pictures үшін — 7-тіл болды. Шығыс Еуропа мен ТМД елдері үшін шығарылатын Blu-Ray-де көруге арналған голливудтық фильмдердің 7 негізгі тілдеріне енді.

«Өзіңнен баста» жобасының онлайн-серіктесі Ресей мен ТМД-дағы ең ірі ivi онлайн кинотеатры. Ондағы арнайы бөлімде қазақ тілінде дубляждалған алдыңғы голливудтық туындыларды көруге болады!

«Болашақ» корпоративтік қоры — коммерциялық емес ұйым, қайырымдылық және ерікті қызметті қалыптастыруға ықпал етеді. Қордың қолданыстағы жобалары: «Әрбір бала мектепке лайық», «Өзіңнен баста», «Қысқы Қайырымдылық балы», «Жол жүру гранттары» — сапалы білім алуға, халықтың әлеуметтік осал топтарынан шыққан балалардың зияткерлік және шығармашылық әлеуетін дамытуға тең мүмкіндіктерге қол жеткізуді, сондай-ақ әлемдік киноөндірушілердің қазақ тіліндегі контентіне қолжетімділікті қамтамасыз етеді. «Өзіңнен баста» жобасының идеялық шабыттандырушысы «Болашақ» корпоративтік қоры қамқоршылық кеңесінің құрметті мүшесі Бауыржан Қадырғалиұлы Бәйбек.



Фото: дереккөз

Сізден жаңалық