Бас жаңалықтар
Көпбалалы аналар үшін баспана кезегі бөлек болуы мүмкін - министр
18 Наурыз 2019, 15:13 3749

Көпбалалы аналар үшін баспана кезегі бөлек болуы мүмкін - министр

Астана, BAQ.KZ тілшісі. Астанадағы көпбалалы аналармен болған кездесуде ҚР Еңбек және xалықты әлеуметтік қорғау министрі Бердібек Сапарбаев көпбалалы аналар үшін бөлек баспана кезегін құру жайлы айтты.

«Алтын алқа» иегерлері жалпы тізімде тұрмайды. Қазіргі кезде біз көпбалалы аналар үшін бөлек бір кезекті құру мәселесін пысықтап жатырмыз. Бірақ оны бірден жасай алмаймыз ғой. Бәрін жан-жақты қарау қажет. Қанша қаржы керек? Қанша баспана салу керек? Соның бәрін жан-жақты қарастырамыз», - деді Бердібек Сапарбаев.

Сонымен қатар, министр атаулы әлеуметтік көмек туралы айтты.

«Атаулы әлеуметтік көмекке келсек, Мемлекет басшысы нақты тапсырма берді, бұрын жанұяның әрбір мүшесіне табысты есептегенде (күнкөріс минимумының - авт.) 50%-дың деңгейінде болса, енді оны 70%-ға көбейтеді. Егер бұрын 14 849 теңге болса, 1 сәуірден бастап, оның көлемі 20 789 теңгеге көтеріледі. Ал енді Астана қаласында басқа өңірлермен салыстырғанда, орта жалақы жоғары, сондықтан 21 698 теңгеге дейін көтеріледі. Біздің болжамымыз бойынша осы шарамен, кем дегенде, 830 мың қазақстандық қамтылады. Ал Астана қаласында, кем дегенде, 6 700-ге жуық», - дейді министр.

Оның айтуынша, көпбалалы отбасының мүшесі жоғары оқу орнында оқыса, 21 мың теңгенің жәрдемақысы 23 жасқа дейін төленеді. 

"Осылайша, осы уақытқа дейін жанұяның әрбір мүшесіне 4 834 теңге төленіп келсе, 1 сәуірден бастап отбасының әрбір мүшесіне 20 789 теңге төленетін болады. Ал Астана қаласында - 21 698 теңге. Сонымен қатар, отбасындағы ер адамға да, әйелге де бұрынғыдай 10 500 теңге қосымша төленеді», - деді ол.

Ержан Жаубай

Сізден жаңалық