Алматы, BAQ.KZ. Эпидемиологиялық жағдайдың жақсаруына және карантин шараларының жеңілдетілуіне байланысты кезең-кезеңімен «демалыс күнгі» жәрмеңкелер ашу туралы шешім қабылданды. Бұл туралы Алматы әкімдігі хабарлады.
Бірінші кезеңде Бостандық («Қазақфильм» шағын ауданы), Әуезов (Абай даңғылы – Өтеген батыр көшесі) және Алмалы (Гоголь – Масанчи көшесі) аудандарының жәрмеңкелері қызметін қайта бастайды. Олар өздерінің жұмыстарын осы демалыс күндері: 19-20 қыркүйекте бастайды. Қалған «демалыс күнгі» жәрмеңкелерді ашу мәселесі қосымша қаралады, - делінген хабарламада.
Барлық нысандарға санитариялық-эпидемиологиялық нормалардың талаптары (бетперделер мен антисептиктердің, келушілерге арналған термометрияның болуы, әлеуметтік арақашықтықтың сақталуы) қойылады.
