Бас жаңалықтар
Алматыда 184 діни бірлестік жұмыс істейді
05 Қазан 2021, 18:25 7016

Алматыда 184 діни бірлестік жұмыс істейді

Алматы, BAQ.KZ. Алматы қаласы әкімінің орынбасары Ержан Бабақұмаров Дін істері басқармасының қалалық алқасын өткізді. Жиында 9 айдың қорытындысы бойынша дін саласындағы мемлекеттік саясатты іске асыру мәселелері қаралды.

Бүгінде қалада 17 конфессияның 184 тіркелген діни бірлестігі жұмыс істейді. 115 ғибадат үйі қызмет көрсетеді, оның ішінде 52 мешіт, 20 православ шіркеуі мен соборлар. Дін саласында осы жылы 16 жоба іске асырылуда, 10 ҮЕҰ және өзге де ұйымдар тартылды.

Конфессияаралық келісімді қамтамасыз ету мақсатында Алматыда діни бірлестіктер көшбасшыларының клубы жұмыс істейді. Конфессиялар мен мемлекеттік органдар өкілдерінің арасындағы сенімді қарым-қатынастарды дамытуға оң ықпал ететін түрлі мәдени, спорттық іс-шаралар мен жиналыстар өткізіледі.

Діни сауаттылықты арттыру, халықтың зайырлылық қағидаттарын және радикалды идеологияның зияндылығын түсіндіру үшін ақпараттық-түсіндіру жұмыстары жүргізіледі. Жыл басынан бері 63 мың адамды қамтыған 507 іс-шара өткізілді, бұл 2020 жылға қарағанда 80%-ға артық. Діни ахуалды бағалау бойынша әлеуметтік зерттеу нәтижелеріне сәйкес халықтың дін саласындағы мемлекеттік саясатты қолдауы 89,1%-ды құрайды,-делінген хабарламада.
Алқа қорытындысы бойынша қала әкімінің орынбасары Ержан Бабақұмаров конфессияаралық келісімді нығайту мәселелері бойынша рухани-түсіндіру жұмысын арттыруды, сондай-ақ экстремизм мен терроризмге қарсы іс-қимыл мәселелерінде мемлекеттік органдардың барлық мүдделі ұйымдармен өзара іс-қимылын күшейтуді тапсырды.

Сонымен қатар, Дін істері басқармасы «Рухани жаңғыру» КММ және Алматы қаласы ҚМДБ филиалымен бірлесіп, азаматтардың туған өлкесін дамытуға, әлеуметтік мәселелерді шешуге, оның ішінде әлеуметтік нысандар, мектептер, медициналық мекемелер салу жөніндегі жобаларды іске асыруға, сондай-ақ өмірлік қиын жағдайға тап болған азаматтарға көмек көрсетуге бағытталған «Туған жер» арнайы жобасына меценаттарды тарту бойынша бірлескен жұмыс жоспарланды.



Фото: ашық дереккөз
Загрузка...