Бас жаңалықтар
Биыл Алматыда 1-сыныпқа 30 мыңнан аса оқушы барады
19 Мамыр 2020, 17:39 137

Биыл Алматыда 1-сыныпқа 30 мыңнан аса оқушы барады

Алматы, BAQ.KZ тілшісі. 2020 жылғы оқу жылында 1-сыныпқа шамамен 30 мың оқушы қабылданады деп жоспарланып отыр. Бұл туралы Алматы қаласы Білім беру басқарма басшысы Ләззат Жылқыбаева брифинг барысында айтты.

Оның айтуынша, қазір қаладағы мектептерде оқушылар орнының жетіспеушілігі өзекті болып отыр. Қала бойынша шамамен 30 мыңдай орын тапшы болып тұр. Жыл сайын өсіп отырған контингентті ескеретін болсақ, келесі жылы оқушы орны бұдан әрі өсуі мүмкін. Осыған байланысты Алматы әкімдігі тарапынан білім беру ұйымдарын қарқынды салу бағдарламасы әзірленген. Бұл бағдарлама қаланың шеткі аудандарында мектептерді салу арқылы іске асырылады, - дейді ол. 

Мәселен, осы жылы Алатау, Наурызбай, Түркісіб аудандарында 9 мектеп және 13 мектепке қосымша ғимарат салу жоспарланған. Нәтижесінде 2020-2021 жылдары 20 мыңға жуық оқушы орны іске қосылмақ. 

Сонымен қатар, Республикалық және жергілікті бюджеттің қаржысымен 2 мектептің құрылыс жұмысы аяқталуда және қосымша 8 мектепке ғимарат салынып жатыр. Олар аяқталса, 5 мыңнан астам оқушы орны іске қосылады. Мемлекеттік жекеменшік әріптестік және әлеуметтік жауапкершілік аясында осы жылы 5 мектептің құрылысы және қосымша 2 ғимарат салу басталады. Бұл 6 мыңға жуық оқушыны қамтиды. Сондай-ақ, 4 жекеменшік мектептің құрылысы жүріп жатыр, - дейді Ләззат Жылқыбаева. 

Оның айтуынша, 2020-2021 жылдары білім беру ұйымдарын қарқынды салудың арқасында 47 463 қосымша оқушы орыны іске қосылады. Бұл мектептердегі орын жетіспеушілігін 80 пайызға азайтады.

Бұған дейін Алматы қаласы бойынша 190 мемлекеттік және 49 жекеменшік мектептің түлегі ҰБТ-ға қатысатыны анықталды.


Фото: дереккөз
Загрузка...