Бас жаңалықтар
Ақтөбелік оқушы "ақылды маска" ойлап тапты
23 Қаңтар 2021, 22:51 257

Ақтөбелік оқушы "ақылды маска" ойлап тапты

Нұр-Сұлтан, BAQ.KZ. Ақтөбелік оқушы Арман Жалғасбаев вирустан қорғайтын және сигнал беретін маска ойлап тапты. Бұл туралы ҚазАқпарат ХАА хабарлады.

Арман Жалғасбаев Ақтөбе қаласындағы физика-математика бағытындағы Назарбаев зияткерлік мектебінде білім алып жүр.

 Өнертапқыш «KIRC.KZ - 2021» халықаралық байқауына қатысып, І-орынды иеленді. Жеңімпаз оқушыға 300$ көлемінде ақшалай сыйлық пен диплом табыс етілді. Оның робототехника саласы бойынша халықаралық жарысқа ұсынған «RUD SMART MASK» жобасы респираторлық маска мен қоршаған орта анализаторы функциясын атқара алады. 

Маска екі негізгі бөліктен тұрады. Біріншісі, ауадағы газды анықтауға арналған талдау және сигнал жүйесі. Ақпарат bluetooth-модуль арқылы таратылады. Ал екінші бөлігі сүзгі есебінде қолданылады. Маска ағзамызды лас ауа мен вирустан қорғайды. Тұтынушыға ыңғайлы болуы үшін екі компонент өзара неодим магнитімен жалғанып тұр, - дейді Арман Жалғасбаев. 

Маска сапасы мен оны қайта пайдалану аса маңызды. Жас өнертапқыш «ақылды масканы» тазалауға арналған RUD STAND құрылғысын да жасады. 

Маска фильтрі ультрамедколь, спанбонд, белсендірілген көмір қосылған мата және акрилден жасалды. Біздегі аппарат оны арнайы ультракүлгін сәулелер көмегімен бірнеше минут ішінде залалсыздандырады. Нәтижесінде маска қауіпсіздікті қамтамасыз етеді, - деді ақтөбелік зияткер. 

Айта кетейік, Ш.Уәлиханов мектебі ұйымдастырған халықаралық жарысқа Ресей мен Өзбекстан, Түркия мемлекеттерінен де жобалар ұсынылды. Әлемдегі короновирустық пандемияға байланысты байқау онлайн форматта өтті.

Естеріңізде болса, бұған дейін қидан тыңайтқыш жасап шығарған оқушы туралы жазған болатынбыз.


Фото: inform.kz
Загрузка...