Бас жаңалықтар
7 үй тонаған 22 жастағы жігіт қолға түсті
30 Қыркүйек 2021, 02:20 1306

7 үй тонаған 22 жастағы жігіт қолға түсті

Нұр-Сұлтан, BAQ.KZ. Қызылордалық полицейлер бірнеше пәтер ұрлығына қатысы бар деген күдікпен 22 жастағы қала тұрғынын қолға түсірді. Күдікті  қала аумағында орналасқан 7 үйді тонаған. Жұмыссыз жігіт үй иелерінің жұмыста болғанын  пайдаланып, қымбат үлгідегі Айфон телефондарын, велосипед, алтын бұйымдарды, тұрмыстық техникаларды және үй иелеріне тиесілі ақшаларды қолды еткен. Ұрлаған дүниелерді сатып, алтындарды ломбардқа өткізген.  

Қызылорда қалалық полиция басқармасының криминалдық полиция бөлімінің  қызметкерлері жедел-іздестіру шараларын жүргізіп, күдіктіні қолға түсірген. Қазіргі таңда әккі пәтер ұрысы уақытша ұстау абақтысына қамаққа алынып, кінәсін  толық мойындаған.

Күдікті  үйлерге ұрлыққа түспес бұрын тыңғылықты барлау жұмыстарын жүргізген. Әр үйге әр түрлі жолмен кірген.  Көбінде пластик терезені күштеп ашу арқылы үйге енген. Бұл дерек  бойынша Қазақстан Республикасы Қылмыстық кодексінің 188-бабының 3-бөлігінің 3-тармағы бойынша сотқа дейінгі тергеп-тексеру амалдары жүргізілуде.  Мұндай әдіспен жасалған ұрлық үшін күдікті 3-7  жылға дейін бас бостандығынан айырылуы мүмкін, – делінген қалалық полиция басқармасы таратқан хабарламада.

Сонымен қатар полиция қызметкерлері  күдіктінің басқа да осыған ұқсас қылмыстарға қатыстылығын  тексеріп жатыр. Бұдан бөлек, сыбайластарының бар-жоғын да анықтауда.



Фото: ашық дереккөз
Загрузка...