«7-20-25» бағдарламасына қатысқандардың 72%-ы қазақша сөйлеген

25 Қыркүйек 2021, 19:04
2301
Бөлісу:
«7-20-25» бағдарламасына қатысқандардың 72%-ы қазақша сөйлеген

Алматы, BAQ.KZ тілшісі. Бұл туралы «PR-шы» клубының вице-президенті, «Қазақстанның орнықтылық қоры» АҚ-ның PR менеджері Айбар Олжай Алматыда өткен XVII Халықаралық PR-форумында айтты.

Форум аясында B2C секторы, әсіресе оның қаржы саласында қазақ тілінің аясы кеңейіп жатқаны талқыланды. Мамандардың айтуынша, бұл – бизнес үрдістерді қайта құруға алып келуі мүмкін. 

Алдына келген қазақша сөйлейтін адамға компания дұрыс қызмет көрсете алмаса, ол пайдадан айрылып қана қоймай, болашақта жабылып тынуы да мүмкін.

Жиын барысында еліміздегі банктер клиенттің тілінде сөйлеуге дайын ба? Тілдік ерекшелік бизнеске қалай әсер етеді? Мемлекеттік тілдегі коммуникацияларда қандай факторларға назар аудару керек? Ірі халықаралық бизнес қазақи өңірлерде қалай жұмыс істеуі тиіс деген тақырыптар талқыланды.

«7-20-25» бағдарламасына қатысқандардың 72%-ы қазақша сөйлеген


 

PR-шы Айбар Олжайдың айтуынша, «7-20-25» ипотекалық бағдарламасына қатысты сауалдардың 72 пайызы қазақ тілінде, 28 пайызы орыс тілінде келіп түскен.

Бағдарлама бойынша жан-жақты ақпарат қарапайым әрі түсінікті тілде берілгендіктен, «7-20-25» ипотекасы еліміздегі ең танымал тұрғын үй бағдарламасына айналды. Мәселен, 2018 жылы бұл бағдарлама бойынша 140 298 сауалдың 75%, 2019 жылы 378 169 сауалдың 72%, 2020 жылы 390 495 сауалдың 68%, 2021 жылы 29 420 сауалдың 73%-ы қазақ тілінде қойылған. Демек мемлекеттік тілдің бизнесте қолданылу аясы жыл санап кеңейіп барады. Сондықтан келесі жылдан бастап корпсекторға бейімделген, екі тілді аудиторияға бөлек екі коммуникациялық стратегия әзірлеген дұрыс. Ол орысшадан аударылған калька емес, қазақтілді аудиторияға әу бастан қазақша ойластырылған, қазақ тілінде жазылған стратегия болу керек, - деді Олжай. 

Қазақ тілінде сөйлейтін клиенттер саны артқанын өзге компанияның PR-лары да қостады. Мәселен, Kaspi Банк өнімдерін тұтынған клиенттердің 49 пайызы қазақ тілін таңдаған. 2017 жылы ВТБ Банктің колл-орталығына қоңырау шалған клиенттерінің 35 пайызы қазақ тілін таңдаса, 2021 жылы бұл көрсеткіш 45 пайызға жеткен. 

Каспий Құбыр Консорциумы ірі халықаралық компанияның PR менеджері Айна Задабек қазақи өңірдің ерекшелігін ескеріп, өз коммуникациялық саясаттарын осы бағытқа бұра бастағандарын мәлімдеді.

Мамандар сервистік қазақ тілін дамытуға, клиенттердің көңілін табуға назар аударуды, қазақ тілін бизнестің икемді тіліне айналдыру тұрғысында сөз қозғады. 
 

Өзгелердің жаңалығы