Нұр-Сұлтан, BAQ.KZ тілшісі. Ұлттық жобаның «Индустриялық инновациялық даму» бағыты шеңберінде екі негізгі міндет айқындалды.
Бұл туралы Ұлттық экономика министрі Әсет Ерғалиев мәлімдеді.
Министр бұл жолда өңдеуші өнеркәсіп кәсіпорындарын технологиялық жаңғырту, сондай-ақ өндіріс көлемін ұлғайту, өңдеу өнеркәсібі тауарларының номенклатурасын кеңейту керектігін айтты.
Бірінші міндетті шешу үшін кәсіпорындардың жаңа технологияларды сатып алуға және енгізуге, жабдықтарды монтаждауға және іске қосу-жөндеу жұмыстарына, сондай-ақ біліктілікті арттыруға, технологиялық жабдықтарды сатып алуға және кредит беру, оның ішінде лизинг шарттарын жақсартуға жұмсалған шығындарын өтеуге бағытталған кешенді шараларды іске асыру көзделеді, – деді Әсет Ерғалиев.
Оның айтуынша, 2025 жылға дейін өңдеуші өнеркәсіптегі цифрлық технологияларды пайдаланатын кәсіпорындардың үлесін 7-ден 23%-ке дейін арттыру жоспарлануда. 2025 жылға қарай 418 индустриялық жоба іске асырылып, негізгі капиталға 11 трлн теңгеден аса инвестиция тартылады. Нәтижесінде өңдеу өнеркәсібі өндірісінің көлемі 2020 жылдың деңгейіне 1,5 есеге артады.
