Бас жаңалықтар
1 қыркүйектен бастап мектептерде жаңа пән енгізілетін болды
24 Мамыр 2019, 22:08 547

1 қыркүйектен бастап мектептерде жаңа пән енгізілетін болды

Нұр-Сұлтан, BAQ.KZ. "Мектепте шахмат үйрету" бағдарламасы аясында өткен байқауда Қазақстанның 40 білім беру мекемесі жеңіске жетті. Енді оларда 1 қыркүйектен бастап шахмат пән ретінде оқытылатын болды, деп хабарланды Zakon.kz сайтында. 


Байқау жеңімпаздары оқулықтармен бірге бүкіл техникалық құрал-жабдықпен қамтылады. 

"1 наурыз бен 7 сәуір аралығында Қазақстанда осы бағдарламаны жүзеге асыру үшін байқау өткізілді. Барлығы 111 өтініш түсіп, сарапшылар кеңесі бір ай бойы әр кандидатураны мұқият қарады", - деді жобаның менеджері Салтанат Ноғайбаланова.

Жоба менеджері байқаудың сыйлық қорында қандай заттардың бар екенін айтып өтті.

"Байқаудың сыйлық қорында ноутбуктер, колонкалар, көпфункциялы құрылғы, проектор, шахмат тақтасы мен фигуралары, сағаттар және көркемдік материалдар болды. Бұдан бөлек, Қазақстан шахмат федерациясы бастауыш сыныптарға арнайы әзірлеген әдістемелік құралдар мен оқыту бағдарламасы мектептерге беріледі", - деді ол. 

Бүгінде бұл бағдарлама Алматы, Павлодар, Қызылорда және Шымкент қалаларының 2 мыңнан астам оқушы білім алатын 44 мектебінде жүзеге асырылған. Материалды игеру оңай болуы үшін арнайы оқулықтар құрастырылып, 85 бапкер мен 41 мектеп психологы дайындықтан өтіпті.

Шахматтың балаларға ықпалын тексеру мақсатында 22 мектепте тәжірибе жүргізіліп, оған бастауыш сыныптың 1700-ден астам оқушысы қатысқан. 

"Мектепте шахмат үйрету – федерацияның басым бағыттарының бірі. Жаңа оқу жылында бағдарлама Қазақстанның 34 қаласы мен ауылындағы 84 мектепте жұмыс істейтін болады. Байқауға республиканың барлық облысы қатысқаны өте қуантарлық жайт. Мәселен, Павлодардан 20 өтініш келіп түскен", - дейді Қазақстанның шахмат федерациясының атқарушы директоры Ирина Грищенко, - 
Байқауда жеңіске жеткен мектептер елдің 30 қаласы мен ауылында орналасқан: Көкшетау, Ақтөбе, Темір, Атырау, Алматы, Нұр-Сұлтан, Шымкент, Шу, Жезқазған, Қарағанды, Қарқаралы, Теміртау, Қостанай, Қызылорда, Ақтау, Екібастұз, Петропавл, Арыс қалалары мен Балқаш, Күршім, Уварово, Құлан, Борсеңгір, Ақтоғай, Көктөбе, Чернорецк, Еңбекші, Еңбекту, Шамалған ауылдары.


Фото: ашық дереккөз

Сізден жаңалық