ҰҚК қауіпсіздік сертификатын тестілеуді аяқтады

6 Тамыз 2019, 23:51
2239
Бөлісу:
ҰҚК қауіпсіздік сертификатын тестілеуді аяқтады

Нұр-Сұлтан, BAQ.KZ. «Қазақстан Республикасының Ұлттық Қауіпсіздігі туралы» Қазақстан Республикасының  заңына сәйкес және киберқауіпсіздік пен ақпараттық қауіпсіздікті қамтамасыз ету мақсатында ҚР ҰҚК қауіпсіздік сертификатын қолдануды тестілеуді сәтті аяқтады. Бұл туралы ҚР ҰҚК баспасөз қызметінен хабарлады. 

Нәтижесінде кибер және ақпараттық кеңістікте киберқауіптің алдын алу жүйесі құрылды. Ақпараттық қауіпсіздіктің ұлттық үйлестіру орталығы тек өткен айда ғана мемлекеттік органдар мен жеке компанияларға қатысты 8 млн мәрте вирустық белсенділікті және 130 мың кибершабуылды анықтады.

Бұдан басқа, бірқатар мемлекеттік органдарға кибертыңшылық жасау фактілері ашылды. Сонымен қатар, сертификат енгізудің түйткілді мәселелері зерделенді, байланыс операторларының жұмысына ықпал ететін тұстары тексерілді. Сертификат болашақта ұлттық қауіпсіздікке кибер және ақпараттық шабуыл арқылы қатер төнген жағдайда ел азаматтарына алдын ала ескерту бере отырып қолданылатын болады.

Тестілеу жұмыстарының оң нәтижеге жеткенін ескере отырып, ҰҚК 7 тамыздан бастап тестілеудің тоқтатылатынын мәлімдейді. Жақын арада ресми сайтта жеке құрылғылардағы қауіпсіздік сертификатын өшіру жолдары көрсетілген нұсқаулық жарияланады.



Өзгелердің жаңалығы