Нұр-Сұлтан, BAQ.KZ тілшісі. Бұл туралы ұлттық экономика министрі Руслан Дәленов Үкіметте өткен онлайн отырыс кезінде баяндады.
Экспорт 8 айда 31,9 млрд долларды құрап, төлем теңгерімінің оң сальдосын 8,1 млрд доллар деңгейінде қамтамасыз етті. Дайын және өңделген өнімдердің экспорты ұлғайды. Осы жылғы қаңтар-тамыз айларында автомобильдердің экспорты - 5,7 есе, ферросилиций - 5,4 есе, күнбағыс майы - 86%-ке, темірден жасалған созба сым - 33, титан құймалары - 9,5%-ке өсті, - деп атап өтті министр.
Ол баяндағандай, 9 айда өңдеу өнеркәсібінде өсу жалғасқан.
Автомобиль жасау – 51,6%-ке, фармацевтика – 39,8, дайын металл бұйымдары – 18,9, қағаз өнімдері – 15,1 және жеңіл өнеркәсіп – 14,1%-ке өсті. Кен өндіру өнеркәсібін есепке алмағанда, жалпы экономика бойынша инвестициялар өсуде, - деп баяндады Руслан Дәленов.
Инвестициялар денсаулық сақтауда 85,7%-ке, байланыста – 62,4%, сумен жабдықтауда – 27,4%, тұрғын үй құрылысында – 25,2%, агроөнеркәсіп кешенінде – 15,1%, өңдеуде – 7,3% және көлікте – 5,7%-ке ұлғайды.
Қыркүйекте салалардың көбі өсу көрсетті. Олар ауыл шаруашылығы, құрылыс, білім беру, техникалық қызмет, қаржылық қызмет, сауда, көлік және басқалар.
Министр қыркүйектің көрсеткіштері бойынша қызмет көрсету саласы қалпына келе бастағанын айтты.
