Түркиядағы Республикалық халық партиясының көшбасшысы Өзгүр Өзел ел президенті Режеп Тайып Ердоғанға сенімсіздік білдіру және мерзімінен бұрын сайлау өткізу үшін қол жинау науқаны басталғанын мәлімдеді, деп хабарлайды BAQ.KZ Cumhuriyet басылымына сілтеме жасап.
Бұл бастама Стамбул мэрі Экрем Имамоглуға бостандық талап етілген жаппай митинг кезінде жарияланды. Аталған акцияға 2,2 миллион адам қатысқан.
Жоспар бойынша, Республикалық халық партиясы ертеңнен бастап елдің түкпір-түкпірінде қол жинау науқанын бастайды. Науқанның мақсаты – 2023 жылғы сайлауда Ердоған алған дауыс санымен тең – 27,7 миллион қол жинау. Осы бастама аясында елдің әртүрлі қалаларында митингілер ұйымдастырылады.
Өз сөзінде Өзел түрік билігі тарапынан қамауға алынған саяси тұлғалар мен белсенділерді босатуға шақырды. Атап айтқанда, ол Стамбул мэрі Экрем Имамоглуды, «Zafer Partisi» партиясының жетекшісі Үмит Өздақты және 2016 жылдан бері түрмеде отырған күрд саясаткері Селахаттин Демирташты босатуды талап етті.
Еске салсақ, Имамоглу мен оның жақтастары 19 наурызда ұсталған болатын. Алғашқыда олар 4 күнге қамауға алынған еді. Кейін коррупция, пара алу және пара беру айыптарымен Имамоглу ресми түрде тұтқындалып, Стамбул мэрі қызметінен босатылды. Осы оқиғалардан кейін ел көлемінде, билік тыйым салғанына қарамастан, жаппай наразылықтар басталып кетті. Осы жағдайдың аясында CHP партиясы Имамоглуды ресми түрде президенттікке үміткер ретінде ұсынды.
Айта кетейік, бұған дейін президент Режеп Ердоған парламенттегі Әділет және даму партиясының отырысында сөз сөйлеп, оппозицияны «көшедегі бүлікшілдікті» тоқтатуға шақырған болатын. Ол сондай-ақ оппозиция өкілдерін коррупцияға қатысы бар деп айыптады.
0
0
0
0
0
