Көңіл толқытар сәт және армандар: Сіз соңғы қоңырауда жыладыңыз ба?

Нұр-Сұлтан, BAQ.KZ тілшісі. Бүгін - соңғы қоңырау. Барлық білім ордасында мектеп бітіру салтанатты жиыны өтіп, түлектер мектеппен қоштасып жатыр.

Елордадағы №75 мектепте мектеп бітіру кеші өткізілді. Соңғы қоңыраудың қалай өткенінен назарларыңызға ұсынылған фоторепортаждан көре аласыздар.

Көңіл толқытар сәт және армандар: Сіз соңғы қоңырауда жыладыңыз ба?

Осы мектепте ұйымдастырылған «Соңғы қоңырау» салтанатты жиыны Білім және ғылым министрі Асхат Аймағамбетовтің қатысуымен өтті.

Түзел! Тік тұр! Назар ортаға! Директор ханым, мектеп Соңғы қоңырауға арналған салтанатты сап түзеуге дайын. Сап түзеуді бастауға рұқсат етіңіз, - деді формадағы мұғалім.

Ал мектеп директоры сап түзеуге «рұқсат» етті.

Осылайша бір жыл бойы тәрбие мен білім нәрін бойына сіңіріп, ұстаздарына анасындай еркелеп, балалық шағын алаңсыз өткізген жас түлектердің мектебімен, ұстаздарымен қоштасар сәті келді.

Биыл соңғы қоңырау дәстүрлі форматта, ешқандай шектеусіз өтіп жатыр. Сондай-ақ 2022 жылы №75 мектепте түлектердің сегізінші легі ұшқалы тұр. Биыл осы білім ордасын аяқтайтын түлектер саны - 201.

Әрине бұл күн, яғни соңғы қоңырау мектеп тарихында және түлектердің есінде мәңгі сақталатын күн.

Ең алдымен ортаға мектептің биылғы түлектері шақырылды. Түлектерді қошеметпен ортаға спортшы оқушылар алып шықты.

Салтанатты іс-шарада оқушыларымыз Әнұранды орындады.

Айта кетейік, жақында ғана Нормандияда (Франция) өткен оқушылар арасындағы Дүниежүзілік гимназиядаға №75 мектептің 3 оқушысы қатысып, жүлделі орындарға ие болды. Атап айтқанда, 10-сынып оқушысы Аруана Құсыманова көркем гимнастикадан алтын және 9-сынып оқушысы Анастасия 400 метрге жүгіруден күміс медальге ие болды.

Аталған мектепте «Алтын белгіге» 6 үміткер, ал үздік аттестатқа 14 үміткер бар. Сонымен қатар халықаралық жобалар сайысының ондаған, спорт жарыстарының жүздеген жеңімпаздары тіркелген.

Сонымен қатар салтанатты жиында Білім және ғылым министрі Асхат Аймағамбетов оқушыларға, мектеп бітіруші түлектерге жылы лебізін, тілегін жеткізді.

Қымбатты достар, түлектер! Бүгін сіздер үшін ерекше күн. Сіздер алтын ұяларыңыз мектеппен қоштасқалы отырсыздар. Сіздердің алдыларыңызда жаңа өмір, жаңа бастамалар күтіп тұр. Сіздер ерекшесіздер. Өйткені пандемия жағдайында қашықтан оқыту форматында оқып, барлық сын-қатерлерге төтеп беріп, оларды жеңіп, шыңдалып, мектепті бітіргелі тұрсыздар. Сіздер «Жаңа Қазақстанның» түлегісіздер! Осы «Жаңа Қазақстанды» құру, елімізді дамыту сіздердің қолдарыңызда екенін ешқашан ұмытпаңыздар, - деді министр.

Одан бөлек, мектеп бітіру кешігінің тағы бір қадірлі қонағы, мектептің қамқорлық кеңесінің мүшесі, 11-сынып оқушысының ата-анасы, қалалық мәслихат депутаты Динара Сәтжанова да қатысты.

Ол балаларға тілегін айтып, болашақ өмірге сәттілік тіледі.

Құрметті оқушылар, ата-аналар және ұстаз! Бүгінгідей шуақты күні соңғы қоңырау мерекесімен құттықтаймын. Түлектерімізге ақ жол тілеймін. Балаларымыздың денсаулығы мықты болсын. Аса қадірлі ұстаздар! Әрине сіздердің атқарып жатқан жұмыстарыңыз оңай емес. Сіздерге еңбекте табыс тілеймін! – деді ата-ана.

Сонымен қатар 10-сынып оқушылары да мектеп бітіруші түлектерге ізгі тілектерін жолдады.

Жарқын болашаққа қадам басқалы отырған жас түлектер! Бүгін сіздер алтын ұя мектебімізбен қоштасқалы отырсыздар. Біз, 10-сынып оқушылары сіздерден қасиетті аманатты қабылдап, №75 мектеп-гимназиямыздың беделін арттырып, «Жаңа Қазақстанды» жаңаша дамытып, Отанымыздың адал азаматы болуға ант етеміз, - деді оқушылар.

1-сынып оқушылары да мектеп бітіруші түлектергі ең жақсы тілектерін арнады. Олар болашақта әр саланың мықты маманы атануларын тіледі.

Осыдан кейін түлектер қоштасу вальсін биледі.

Түлектер ашық аспаған ақ көгершіндерді ұшырды.

Мектепте 11-сынып түлектерінен бөлек, 4-сынып түлектері де бастауышпен қоштасып, келесі жаңа оқу жылында орта білім өміріне қадам басып, 5-сыныпқа өткелі тұр. Олар да ортаға шығып, 4-сыныппен қоштасып, өнерлерін көрсетті.