BAQ.kz - Қазақстан жаңалықтары USD 371.31 BAQ.kz - Қазақстан жаңалықтары EUR 419.32 BAQ.kz - Қазақстан жаңалықтары RUB 5.59
Астана:

Атырау облысында мемлекет басшысының Жолдауы талқыланды

10 қазанда Атырау облысының активі мемлекет басшысының «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауын талқылап, осы бағдарламалық құжатты жүзеге асыру аясында қолға алынатын алдағы міндеттерді бірге белгілеу үшін жиналды, деп хабарлайды Baq.kz ақпарат агенттігі.

«Мемлекет басшысы «Бизнестің жол картасы-2020» бағдарламасын 2025 жылға дейін ұзартуды тапсырды. Бұл тағы да көп жобаларды жүзеге асыруға, сол арқылы кәсіпкерлікті дамытуға мүмкіндік береді. Аталған бағдарлама іске аса бастаған уақыттан бері, 2010-2018 жылдар аралығында 1158 кәсіпкер 81,3 млрд теңге көлемінде мемлекеттік қолдауға ие болды», -деді Нұрлан Ноғаев. –Бұл 5,7 мыңнан астам жаңа жұмыс орнының ашылуына септігін тигізді.

Аймақтағы бизнес-құрылымдармен жалпы сомасы 182,6 млрд теңгенің өнімі өндірілді. Мемлекеттік қолдау бағдарламалары кәсіпкерлерге жаңа өндіріс орындарын ашуға серпін берді. Қазір өңірдегі шағын және орта бизнес субъектілерінің саны 57 мыңға жетті. Бизнесті жүргізуге қолайлы жағдай жасау үшін облыс орталығында, барлық аудандарда кәсіпкерлерді қолдау орталықтары ашылды.

«Мемлекет басшысы халықты алаңдататын мәселелерге жеке-жеке тоқталды. Бірінші кезекте тұрғын үй-коммуналдық саладағы тарифтер. Атырау облысы бойынша коммуналдық қызмет тарифтері, соның ішінде электр энергиясы, су және кәріз қызметтері бойынша биыл өсу деңгейі болған жоқ. Жолдаудың тағы бір бағыты экспортқа бағытталған индустриализация мәселелері. Облыста 44 кәсіпорын экспортқа бағытталған өнім шығарады. Жыл басынан бері 152,4 млн доллардың тауары өндірілді. Аталған кәсіпорындардың белсенділіктерін арттыру бойынша жұмыс жүргізіп жатырмыз», - деп атап өтті Нұрлан Ноғаев.

Отандық экономиканың маңызды саласының бірі – ауыл шаруашылығы. Президент еңбек өнімділігін және қайта өңделген ауыл шаруашылығы өнімінің экспортын 2022 жылға 2,5 есе көбейтуді тапсырды. Сондықтан қазіргі заманғы агротехнологияны жаппай тәжірибеге енгізу керек.

Облыс әкімі Нұрлан Ноғаев активке қатысушы аграрлық қызметкерлерге ауыл шаруашылығын жан-жақты дамыту қажеттілігі туралы ескертті. Бұл бағытта аймақта үлкен жұмыстар жүріп жатыр. Қазір электронды картаға 6432 егістік алқапты қосу жұмыстары жалғасуда. Ауыл шаруашылығы мақсатындағы жеті мыңнан астам алқап электронды картаға енгізілді.

«Жолдаудағы басым міндеттердің бірі - ауыл кәсіпкерлеріне шаруашылық жүргізудің жаңа дағдыларын үйрету. Жаппай оқыту жүйесін қалыптастыру мақсатында биыл «Бастау бизнес» жобасы бойынша кәсіпкерлік негізде оқытуға жергілікті бюджеттен 55,9 млн теңге қаражат бөлініп, оған 1 325 адам «Атамекен» кәсіпкерлер палатасы арқылы оқытылу жоспарланған», - деді аймақ басшысы.

Сонымен қатар, ауыл шаруашылығын қаржыландыруды көбейту жоспарда бар. Алдағы бес жылда агроөнеркәсіп кешеніне салынатын инвестиция 7,4 млрд теңгеге жететін болады.

Жолдау жүктеген міндеттер қатарында дәстүрлі емес энергия көздерін енгізу, халық тұтынатын тауарларды шығаруды дамыту да бар. Жоғарғы, орта білім беру беру салаларында жаңалықтар күтілуде.

«Биыл білім беру саласын дамытуға 62,2 млрд теңге бөлінді. Бұл қаражат білім берудің сапасы мен қолжетімділігін арттыруға тікелей ықпал етеді», - деді Нұрлан Ноғаев.

Өмір сүруге жайлы орта қалыптастыру бағытында елімізде «7-20-25» бағдарламасы қолға алына бастады. Ол қазақстандықтарға тұрғын үй ипотекасын алу мүмкіндігін арттыруға арналған. Мемлекет басшысы әкімдерге жергілікті бюджеттен жеңілдетілген ипотека бойынша бастапқы төлемді ішінара субсидиялауды, ірі қалаларда жалдамалы тұрғын үй құрылысын көбейтуді тапсырды. Атырау облысында осы мәселені шешу үшін тұрғын үй алуға әлеуметтік қолдаудың екі нұсқасы қаралып жатыр – 1 млн теңге көлеміндегі әлеуметтік көмек және 15 жылға процентсіз қарыз беру.

Актив барысында аумақтық даму, полиция қызметінің жұмысын оңтайландыру туралы да айтылды. Жалпы активке қатысушылар Президенттің Қазақстан халқына Жолдауында айқындалған міндеттердің маңыздылығына тоқталып, оларды жүзеге асыруға дайын екендерін жеткізді. Жиынға қатысушылар мемлекет басшысының кезекті Жолдауының уақытылы әрі маңызды екенін айтып, атыраулықтардың ел дамуындағы ерекше құжатты жүзеге асыруға үлес қосатындарын атап өтті.


Біздің Telegram-парақшамызда Қазақстанның маңызды жаңалықтары. Жазылыңыздар!

Ұқсас сілтемелер:
Пікірлер