BAQ.kz - Қазақстан жаңалықтары USD 367.06 BAQ.kz - Қазақстан жаңалықтары EUR 416.17 BAQ.kz - Қазақстан жаңалықтары RUB 5.56
Астана:

Қазақстанда адал жұмыс істейтін турагенттіктер тізімі жасалмақ

Шетелге демалуға шығатын туристер каталогта көрсетілген турагенттікке жүгініп, жолдаманы еш қорықпастан сатып ала алады. Қазақстан турагенттіктері қауымдастығы «Туристік Қамқор» корпоративті қорымен бірлесіп адал жұмыс істейтін турагенттіктердің каталогын әзірлеп жатыр. Ол осы жаздың соңында дайын болады. Бұл туралы бүгін аталған қауымдастық президенті, «Туристік Қамқор» қорының турагенттiктермен жұмыс жөніндегі департамент директоры Әсел Нұркебаева айтты, деп хабарлайды Baq.kz тілшісі.

«Қазіргі таңда бізде турагенттіктердің мемлекеттік реестрі бар. Бірақ, өкінішке қарай, туристік маусым басында алаяқ турагенттіктер туралы ақпарат тарай бастады. Туроператорлық қызмет жүргізбей, «Туристік Қамқорға» кірмейтін бір күндік компаниялар пайда болады. Олар туристерге «супер» арзан тур ұсынып, клиенттерді алдайды. Ақыр соңында туристер сан соғып қалады. Бұл проблема бүгін ғана пайда болған жоқ, баяғыдан бар. Сондықтан жыл басынан бері біз Қазақстанның турагенттіктері қауымдастығы «Туристік Қамқор» қорымен бірлесіп, бұл бағытта жұмыс істеп жатырмыз. Яғни, қандай да бір мәселе туындаса, біз оны бірлесіп жылдам шешеміз», - деді Нұркебаева.

Ол жақын арада нарықта адал жұмыс істейтін туристік агенттіктердің каталогы жасалатынын, оның осы жаздың соңында толық дайын болатынын айтты.

«Біз «Туристік Қамқор» қорымен бірлесіп, алаяқтыққа жол бермейтін, адал турагенттіктердің каталогын құруды жөн көрдік. Ол тізімдегі агенттіктерден туристер еш қорықпастан жолдама сатып ала алады. Қазір біз турагенттіктерге қойылатын талаптарды әзірлеп жатырмыз. Барлық турагенттікті осы тізімге кіруге шақырамыз», - дедi маман.

Сондай-ақ, ол шетелде демалғысы келетiн қазақстандық туристерге бiрқатар кеңес бердi.

«Бағасы аспандап тұрған қонақ үйге тур болса, бірден сатып алмай, ойлану керек. Бұл, ең әуелі, туристің жауапкершілігі. Себебі «люкс» қонақүй бір-екі тиын тұрмайды, оны әркім түсінуі керек. Екіншіден, турагенттікке келген кезде, әр азамат міндетті түрде туристік қызмет көрсетуге келісімшарт бекітілуін талап етуі керек. Бізде келісімшарт типтік, оны төрт министрлік бекіткен. Шетелге шығатын туристің қолында осындай типтік келісімшарт болуы тиіс. Одан кейін, барлық чек, кассалық кіріс ордері, қазыналық чек, «Туристік Қамқор» корпоративтік қоры беретін туркод болғаны жөн», - деп түйіндеді Әсел Нұркебаева.


Біздің Telegram-парақшамызда Қазақстанның маңызды жаңалықтары. Жазылыңыздар!

Ұқсас сілтемелер:
Пікірлер