BAQ.kz - Қазақстан жаңалықтары USD 369.98 BAQ.kz - Қазақстан жаңалықтары EUR 428.7 BAQ.kz - Қазақстан жаңалықтары RUB 5.64
Астана:

Республикалық «Ұлы дала рухы» фестивалінің алғашқы кезеңі Түркістан облысында басталды

Бүгін бұл туралы ОҚО өңірлік коммуникациялар қызметінде өткен брифингте Республикалық Ұлттық және ат спорты түрлері орталығының директоры Нұрсұлтан Ибрагимов мәлім етті, деп хабарлайды Baq.kz ақпарат агенттігі.

Оның айтуынша, 2018 жылдың 13-15 шілде аралығында республикалық «Ұлы дала рухы» фестивалінің алғашқы жарыстары оңтүстік аймағында өтеді.

«Айтулы шараның ашылу салтанаты кезінде оңтүстік аймақтың жеребесі тайқазан ішіне салынған теңге орамалдар арқылы анықталды. Оңтүстік аймағына Қызылорда облысы, Жамбыл мен Түркістан облысы мен Алматы қаласының командалары іріктелді. Осы төрт өңірдің спортшылары Шымкент қаласында көкпар, қазақ күресі, тоғызқұмалақ, асық атудан жарысқа қатысады. Әуелі «Құлагер» атшабарында 48 спортшы қатысып, көкпардан жеңімпаз команда анықталады. Ал Ә.Юсупова атындағы көркем гимнастика залында қазақ күресінен 8 салмақ бойынша 32 балуан бақ сынаса, асық атудан 12 мерген өзара мықтыны анықтайды. Сондай-ақ, Шымкент қонақ үйінде тоғызқұмалақшылар арасында жарыс өтеді. Жалпы оңтүстік аймақтағы іріктеу жарысына 160 спортшы қатысады деп жоспарланып отыр», - деді Нұрсұлтан Ибрагимов.

Бұдан өзге, аударыспақ, жамбы ату, теңге ілуден жарыстар Астана қаласындағы «Қазанат» атшабарында өтеді. Бұл дүбірлі додада 5 салмақ бойынша 20 балуан арасында аударыспақ алыптары, құралайды көзге атқан 12 жамбышылар мергендері және желден жүйрік 12 теңге ілушілер арасында мықтылар анықталады.

Жарыстың жеңімпаздары мен жүлдегерлері Қазақстан Республикасының Мәдениет және спорт министрлігінің кубок, медальдарымен марапатталады.

Естеріңізде болса, аталған сайыстың ашылу салтанаты 4 шілде күні Астана қаласында өткен болаты. «Ұлы дала рухы» фестивалінің негізгі мақсаты - жастар арасында ұлттық спорт түрлерінің дамуына тың серпін беру. Төрт аймақты қамтитын жобаға еліміздің барлық өңірлерінен спортшылар қатысады. Сайыпқырандар көкпар, бәйге, аударыспақ, теңге ілу, жамбы ату, қазақ күресі, тоғызқұмалақ, асық атудан сынға түсетін болады. Аталған жобаның идея авторы ҚР Мәдениет және спорт министрі А.Мұхамедиұлы.


Біздің Telegram-парақшамызда Қазақстанның маңызды жаңалықтары. Жазылыңыздар!

Ұқсас сілтемелер:
Пікірлер